2015 сыл тохсунньу 1 күнүттэн гражданнары социальнай көрүү-истии туһунан сокуон күүһүгэр киирбитэ.

Сокуон бизнескэ табыгастаах усулуобуйаны үөскэтэрин туһунан О.Винокурова бэлиэтээтэ. «Саҥа сокуон социальнай өҥөлөрү оҥорор тэрилтэлэргэ сыһыаны тосту уларытта. "Социальнай өҥөнү хааччыйааччы" диэн өйдөбүл үөскээтэ. Хааччыйааччынан предприниматель буолуон сөп», -диэтэ кини.

Чэпчэкитэ суох үлэҕэ бизнеһи тардар туһугар кэккэ чэпчэтиилэр киирбиттэр. Ол курдук, социальнай өҥөнү оҥорор тэрилтэ 5 сыл нолуоктан босхолонор, чэпчэтиилээх кредитинэн, о.д.а. туһанар кыахтанар.

Маннык тэрилтэлэр ороскуоттарын сабыыга өрөспүүбүлүкэ бюджетыттан 10 мөл.солк. көрүллүбүт. Ону таһынан социальнай өҥө испииһэгэ кэҥэтиллибит, итинтэн төһөтө босхо оҥоһуллара чуолкайдаммыт.

Бу тэрилтэлэлэр үлэлэрин хонтуруоллааһын Үлэ, социальнай сайдыы министиэристибэтигэр сүктэриллибит.

«Социальнай өҥөнү оҥорор тэрилтэлэр реестрдарын оҥоро сылдьабыт», - диэтэ Оксана Винокурова.

Социальнай бизнесменнэр үлэлэрэ таһаарыылаах буоларыгар предпринимательствоҕа анаммыт сыл көмөлөөх буолуохтаах. «Биһиги өрөспүүбүлүкэбитигэр бизнес уонна социальнай эйгэ хардарыта дьайсан үлэлээбиттэрэ өр буолла. Сорох предпринимателлэр үлэтэ суохтары, инбэлииттэри элбэхтэ үлэҕэ ылаллар. Бу хайысханан үлэ салгыы барыаҕа», - диэн предпринимательство сылын олоххо киллэрэр дириэксийэ салайааччыта Евгений Иванов СИА корреспонденыгар эттэ.