«Мин бу эһигиттэн чугас сытар Уус-Маайа улууһун Эдьээн нэһилиэгэр төрөөбүтүм. Ийэм Матрена Дмитриевна Апросимова диэн, Күп нэһилиэгиттэн төрүттээх. Аҕам Гаврил Еремеевич Исаков 1-кы Эдьээн киһитэ, билигин тыыннаах, 97 сааһын томточчу туолаары олорор кырдьаҕас. Миигин кытары Дьокуускай куоракка олорор. Онон аҕалаах бэйэм оҕо буола сылдьабын, сүрдээх үчүгэй. Бииргэ төрөөбүттэртэн билигин аҕыс оҕо тыыннаахпыт. Инньэ гынан, аҕам дьоллоох оҕонньор: 8 оҕолоох, 23 сиэннээх, 26 хос сиэннээх.

Оҕо сырыттахпына, эһэм Дьэрэмиэй олоҥхоһуттары сэҥээрэр, интэриэһиргээн истэр этэ. Биһиги Эдьээммитигэр үгүс элбэх олоҥхоһуттар, ырыаһыттар төрөөн-үөскээн ааспыттара. Оҕо эрдэхпинэ олоҥхону толорор дьон син баар этилэр. Холобур, аан бастакы истибит олоҥхом «Оһоллоох үйэҕэ ороһулаан төрөөбүт Оҕо тулаайах бухатыыр» диэн, ону 1957 сыллаахха, араадьыйа бастаан киириитигэр, ыам ыйын 25 күнүгэр эһэм 14 оҕонньору мунньан биир чаас устата араадьыйанан истэн сөрү диэн сөхпүттэрэ, толоруохха сөп эбит диэн өйдөбүлгэ кэлбиттэрэ быһыылааҕа», - диэтэ Валентин Гаврильевич.

Уонна П.А. Ойуунускай «Дьулуруйар Ньургун Боотур» олоҥхотуттан быһа тардыыны толорон иһитиннэрдэ. Арчы дьиэтигэр мустубут эбээлэр түмсүүлэрэ, С.А. Новгородов аатынан орто оскуола үөрэнээччилэрэ, кылаас салайааччылара – бука бары бэркэ сэргээн иһиттилэр. Валентин Гаврильевич оҕолорго анаан, өссө эбии таһааттарбыт кинигэлэрин көрдөрдө, хотугу норуоттар «Ньимнакаан» олоҥхоҕо майгылыыр эпостаахтарын туһунан билиһиннэрдэ. Бэйэтэ Ньукулай Трофимов диэн ийэ олоҥхоһуттан үөрэммитин ахтан ааста, ол киһи 6 олоҥхолооҕун, 10 тахса ньимнакааннааҕын бэлиэтээтэ.

1995 сыллаахха сэрии бэтэрээннэрин уонна хоту көһөрүллүү кыттыылаахтарын кытары Булуҥ улууһугар Тиксиигэтэрийээччи быһыытынан барса сылдьан, биир уһун тохтобулга олоҥхолообут. Истээччилэр ортолоругар Чурапчыттан төрүттээх наука доктора Е.И. Коркина баара үһү. Кини эппитинэн, өскөтүн В.Г. Исаков саха олоҥхолорун - «Тойон Дьаҕарыма бухатыыры», «Дьулуруйар Ньургун Боотуру», «Мүлдьү Бөҕөнү», «Куруубай хааннаах Кулун Куллустууру» - толороро эбитэ буоллар, уһулуччулаах олоҥхоһут буолара хаалбыт эбит.