Саҥа киинэ туһунан Прокопий Федоров СИА корреспонденыгар кэпсээтэ: «Киинэни Сыымах бөһүөлэгэр ааспыт сыл сэтинньи ыйыгар устубуппут. Санатан этэр буоллахха, «Давлят» бастакы чааһын эмиэ Сыымахтан саҕалаабыппыт. Аркадий оруолугар толору киирэн, олус табыллан уһуллубута. Бэйэтэ режиссер быһыытынан ураты буочардаах буолан, сорох түгэннэргэ уобараһын бэйэтиттэн тупсаран, өссө чаҕылхай гына арыйан, ситэрэн-хоторон биэрээччи. Онон кинилиин үлэлиир олус чэпчэки этэ. Уопсайынан, «Давлятка» баар аҕа кыннын оруола хара маҥнайгыттан Аркадий Михайловичка анаммыт уобарас буолар.

Киинэбит тыа олоҕун көрдөрөр. Сэтинньи ‒ тыа дьонун-сэргэтин олоҕор улахан суолталаах ыйынан буолар. Онон «Давлятка» муус ылыыта, идэһэ, муҥха курдук үлэ-хамнас күөстүү оргуйара көстүөҕэ, биллэн турар, куорат киһитэ Давлят, хара үлэни үлэлии үөрэммэтэх буолан, көмөлөһө сатыыра, аҕа кыннын кытта уустук, ол да буоллар көрүдьүөс сыһыаннара көстүөҕэ. Киинэ уһуллуутугар булуу-талыы, тэрийии үлэлэригэр сылдьыбыт Анна Охлопковаҕа, Мария Филипповаҕа, Светлана Акимоваҕа, Сыымах олохтоохторугар махталбын тиэрдэбин. Сорох хартыыналарга, быстах оруолларга нэһилиэк олохтоохторо кыттыыны ылбыттара. Киинэни Дьокуускай куораттан сылдьар Ким Третьяков уһулла. Урукку «Давлят» киинэлэрин кытта тэҥнээтэххэ, төрдүс чааспыт хаачыстыбатын өртүнэн ордук буолуоҕа диэн бэлиэтиибит».

«Давлят 4» маҥнай олунньу 20 күнүгэр Сыымах сэлиэнньэтигэр, онтон улууспут бары нэһилиэктэригэр кулун тутар ортотугар диэри көрдөрүллүөҕэ. Майаҕа олунньу 26 күнүгэр «Кинозалга» көрөөччүлэр дьүүллэригэр таһаарыллыаҕа.