«Бастатан туран мин инбэлиит буолар дьылҕаламмыт бары дьахталларга бэйэҕэ эрэли уонна тапталы баҕарыам этэ. Бу күн сырдыгын таптааҥ уонна биир сиргэ олорон хаалымаҥ. Биһиги ситиһиилээх дьахталлар, тапталлаах ийэлэр буолуохпутун сөп. Итиннэ биһиги чугас дьоммут көмөлөстүннэр уонна бары өттүнэн өйөөтүннэр», - диэтэ Безуглова.

Ксения Безугловаҕа анаан «Күннээх дойду Оҕолоро» үҥкүү-инклюзивнай студиятын иитиллээччилэрэ «Туундара тойуга» диэн үҥкүүнү бэлэхтээтилэр.

Инбэлииттэр аан дойдутааҕы күннэригэр Пушкин аатынан Нуучча драматическай театрыгар "Пусть будет мир прекрасен" киэһэҕэ доруобуйаларынан хаарчахтаах дьону өйүү үлэ уонна социальнай сайдыы Министерствотын социальнай политикаҕа департаменын салайааччыта Надежда Шомоева, Дьокуускай куорат Думатын бэрэссэдээтэлин бастакы солбуйааччы Марина Силкина, Дьокуускайдааҕы социальнай харысхал Управлениетын салайааччыта Семен Матвеев, Бүтүн Россиятааҕы инбэлииттэр обществоларын Саха сиринээҕи филиалын бэрэссэдээтэлэ Екатерина Емелина, Бүтүн Россиятааҕы истибэттэр обществоларын регионнааҕы филиалларын бэрэссэдээтэлэ Анна Большева кэллилэр. Кинилэр бары көхтөөх кыттааччыларга махтал суруктары туттардылар.

Тэрээһин кыттыылаахтарын бэйэлэрин музыкальнай нүөмэрдэринэн биллиилээх саха артыыстара Далаана, Саарын, Алексей Потапов, Евгений Прокопьев, Кыталы Куо, Дима Потапов, Алиса Саввинова, Лэгэнтэй үөртүлэр. Итини таһынан «Эрэл» истибэттэр культураларын Дьиэтин айар коллектива, илиинэн ыллааһын республикатааҕы, Бүтүн Россиятааҕы конкурстарын лауреатттара, «Сузорье 2013» Алтыс аан дойдутааҕы илиинэн ыллааһын конкурсун дипломаннара Елена Захарова уонна Айталина Аммосова, «Ай сулустар» этно-студия кытыннылар.