Ксения Безуглова баҕа санаата олоххо киирбитин сэргэ, кини Саха сиригэр бэйэтинэн кэлэн аан бастаан ыытыллар куонкуруһу иилээн-саҕалаан ыытыста уонна дьүүллүүр сүбэ салайааччытынан үлэлээтэ.

«Всемирная королева красоты» титул хаһаайката, «Вертикаль» аан дойдутааҕы куонкурус кыайыылааҕа, «Мисс мира среди колясочников» Ксения Безуглова суруналыыстар ыйытыыларыгар хоруйдаата:

– Кэлээскэнэн сылдьар инбэлиит кыргыттар куонкурустарын ыытар санаа эйиэхэ хаһан киирбитэй?

– Бэйэм кэлээскэнэн сылдьар инбэлииттэр аан дойдутааҕы куонкурустарыгар кыттан кыайыахпыттан ыла ханна баҕарар кэрэ куолар куонкурустарын ыытыахха сөбүн туһунан санаалар миигин иилии кууспуттара. Ити улахан куонкуруска кыттан кыайыым миэхэ общественнай деятель буоларбар, аан дойду устун сылдьарбар, инбэлииттэргэ мэһэйэ суох эйгэни туруорсарбар уонна былааннарбын олоххо киллэрэрбэр көмөлөспүтэ.

Былырыын эһиги куораккытыгар кэлэ сылдьан, куорат баһылыга Айсен Николаевы кытары көрсүбүтүм. Кинилиин истиҥ-иһирэх кэпсэтии кэмигэр Саха сиригэр инбэлиит кыргыттарга куонкурус тэрийиэххэ сөбүн туһунан эппитим. Айсен Сергеевич мин этиибин өйөөбүтэ уонна онно тута дьүүллэспиппит.

– Эн санааҕар бүгүҥҥү куонкурус сүрүн соруга тугуй?

– Улахан бырайыакпытын олоххо киллэрии, биллэн турар, инбэлиит кыргыттар күн бүгүҥҥэ диэри кистии сылдьыбыт эбэтэр кыайан туһамматах айар дьоҕурдарын көрдөрөргө кыаҕы биэрэр. Биһиги маннык куонкурустар инникитин кыргыттар бэйэлэрин атын дьонтон итэҕэһэ суохтук сананалларыгар тирэх буолуоҕар эрэнэбит. Бэйэни намтатыммакка хорсуннук дьонҥо-сэргэҕэ тахсыыттан уонна кинилэри билиниилэриттэн сиэттэрэн, ким эрэ уопсастыбаннай деятель буолуон, ким эрэ бэйэтин суруналыыстыкаҕа холонуон сөп. Кэрэ кыыс куонкуруһа кыргыттарга, бастатан туран, кинилэр уопсастыбаҕа толору бырааптаах киһи буолалларыгар өрө көтөҕүллүүнү бэлэхтиэҕэ.

​ -- Саха сирин инбэлииттэригэр мэһэйэ суох эйгэ төһө оҥоһуллубутуй?

– Мин сэрэйэрбинэн, үрдүк таһымнаах. Билиҥҥитэ үчүгэйдик көрө иликпин. Мэһэйэ суох эйгэ былырыыҥҥытааҕар элбээбитигэр эрэнэбин. Тоҕо диэтэххэ, Саха сиригэр ити хайысхаҕа олус элбэх үлэ ыытылларын билэбин.

​ -- Бүгүҥҥү куонкурус кыттыылаахтарын ханнык критерийдэринэн сыаналыаххытый?

-- ​ Мин куруук даҕаны куонкурус кыттааччытыгар аан бастакынан кини олоххо тапталын, уопсастыба ортотугар бэйэтин хайдах сананарын сыаналыыбын. Тоҕо диэтэххэ, хас биирдии кыыс, дьахтар уопсастыбаҕа (кыра да эргимтэҕэ) туһалаах буолуохтаах. Кини дьоҥҥо-сэргэҕэ, орто дойдуга үтүө санааны, сырдыгы, уонна үөрүүнү-көтүүнү аҕалыахтаах. Ол иһин, мин кыттааччы сырдыгынан сыдьаайар талаанын уонна туһалаах киһи буоларга төһө баҕалааҕын көрүөм. Баҕар, биһиги бу куонкурустан кинилэр ортолоруттан Саха сирин көхтөөх позициялаах уопсастыбаннай деятелин булан ылыахпыт.

Бастыҥтан бастыҥы биллэрэр долгутуулаах түгэҥҥэ саала иһэ чуумпуран ылла. Ксения Безуглова кыайыылааҕы ааттаатын кытары, ытыс тыаһа хабылла түстэ, уруйдуур саҥалар иһилиннилэр, ким эрэ хараҕын уутун кыайан туттуммата. «Красота без границ» куонкурус кыайыылааҕынан инбэлииттэри профессиональнай уонна медицинскэй-социальнай реабилитациялааһын лицей-киинин студентката, Үөһээ Бүлүүттэн сылдьар Евдокия Прокопьева буолла. Ксения Безуглова кыайыылаахха «Уран Саха» ювелирнай фирма оҥорбут үрүҥ көмүс эксклюзивнай хоруонатын уонна «Сэрбэкэ» салон норка саҕынньаҕы кэтэртэ. Евдокия Прокопьева ахсынньыга Москваҕа «Мисс цивилизация» Бүтүн Россиятааҕы куонкуруска кыттыаҕа.

Ксения Безуглова саха кэрэ кыыһын ис сүрэҕиттэн эҕэрдэлээтэ: "Евдокия кэрэ муҥура суоҕун туоһулуур хоруонатын илдьэ сылдьар толору кыахтаах, дьоһуннаах Кэрэ куо. Киһи ылар эрэ буолбакка, биэрэри сатыыр буоллаҕына эрэ дьоллоох. Дьокуускайга эһиги олоххутун тупсарарга элбэх уларыйыылар тахсыбыттарын туоһулара буолбуккутугар махтал!".