Профилактика киинин дириэктэрин солбуйааччы Саргылаана Титова иһитиннэрбитинэн, быраастар улахан дьон уонна оҕолор доруобуйаларын биир кэлим скрининговай ньыманан көрөллөр. Ким баҕалаах ЭКГ-га сүрэхтэрин, хааҥҥа төһө холестерин уонна глюкоза баарын быһаартараллар. Ону таһынан харахтарын, тиистэрин, хаан баттааһынын, ыйааһыннарын уонна эт-хаан өттүнэн туруктарын бэрэбиэркэлэтэллэр.

Урут иһитиннэрбиппит курдук, өрөспүүбүлүкэҕэ быйыл сэттис көһө сылдьар доруобуйа киинэ Нам улууһугар баар буолла. Ити курдук сылтан сыл аайы улуустарга мобильнай кииннэр эбиллэллэр.

Өрөспүүбүлүкэтээҕи мобильнай киин аҥардас ааспыт сылга өрөспүүбүлүкэ улуустарыгар сүүстэн тахсата сылдьан, тыһыынчанан киһи доруобуйатын көрдө-иһиттэ. Мобильнай биригээдэ Ньурба улууһугар тиийбитин нэһилиэнньэ үөрэ-көтө көрүстэ. «Көлүөһэлээх» дьоҕус поликлиника кинилэр нэһилиэктэригэр хаһан тиийэн кэлэрин тэһийбэккэ күүтэллэр.