Хас биирдии үҥкүү, ырыа үөрүү-көтүү аргыстанна, ытыс тыаһынан доҕуһуолланна. Онон оҕолор “Саха куукулалара”, “Бриллианнар”, “Хоту дойду тыына”, “Чыычаахтар”, “Кытай сюитата” о.д.а. үҥкүүлэрин өрө көтөҕүллэн толордулар.

-- Ансаамбыл тэриллибитэ сыл эрэ буолла. Биһиги Дьокуускай куоракка ыытыллар тэрээһиннэргэ, Москваҕа норуоттар икки ардыларынааҕы IV фестиваль-куонкуруска кыттыбыппыт. Бу Афанасий Афанасьевич төрөөбүт, улааппыт сэлиэнньэтигэр бастакы концерпыт. Дьон-сэргэ истиҥник көрсүбүтүттэн улаханнык үөрдүбүт, -- диир ансаамбыл салайааччыта Зоя Соловьева. Кини кэпсээбитинэн, оҕолор бу айантан-сырыыттан олус астынан, кулун тутар 18 күнүгэр буолуохтаах отчуоттуур концертарыгар санаалара көтөҕүллэн бэлэмнэнэллэр.

-- Оҕолорбут гастролтан олус дуоһуйан кэлбиттэрэ биһигини, төрөппүттэри, улаханнык үөртэ. Кыраайы үөрэтэр уонна космонавтика музейыгар экскурсияҕа сылдьыбыттарын астына кэпсииллэр. Дүпсээ оскуолатын үрдүкү кылааһын үөрэнээччилэрэ көрдөөх оонньуулары, куонкурустары тэрийбиттэрин махтана ахталлар. Биһиги оҕолорбут бу ансаамбылга сылдьаннар үтүөҕэ-кэрэҕэ тардыһыылара күүһүрэр, эппиэтинэстээх буола үөрэнэллэр, бэйэлэригэр эрэллэрэ улаатар, -- диэн төрөппүттэр ааттарыттан Лена Исакова уонна Евдокия Дмитриева эттилэр. Кинилэр ансаамбыл салайааччыларыгар махтаннылар уонна АфанасийАфанасьевичка РФ үтүөлээх артыыһынаатын ылбытынан истиҥ эҕэрдэлэрин тиэртилэр.

Оттон дүпсээлэр “Бриллианты Якутии” толорбут үҥкүүлэрэ, ырыалара тыа сирин дьонун үөрдүбүтүн, долгуппутун эттилэр. Ансаамбыл сайдан, үрдүк чыпчааллары дабайарыгар баҕардылар.