Бу дьон үксэ гражданскайдар. Сокуону билбэттэр. Кэнэҕэс хайдах-туох буолуоҕун ыйдаҥардыбаттар. Тѳрѳппүттэрэ, чугас дьонноро санаа-оноо бөҕө буолбуттар.

Луганскай уонна Донецкай Народнай өрөспүүбүлүкэлэри биир да дойду, ол иһигэр Россия, туспа судаарыстыба быhыытынан билинэ илик. Аны, биһиги дойдубут Луганскайы, Донецкайы кѳмүскээн, Украинаҕа сэриини биллэрбэтэҕэ. Саха уолаттара ЛНР уонна ДНР гражданнара буолбатахтар, тиийэн сэриилэhэллэрэ сокуоннайа суох. Россия Федерациятын ѳттүттэн кинилэргэ ханнык да мэктиэ, социальнай өҥө оҥоhуллубат.

Контрагынан сулууспалыыр саха уолаттара ити сэриигэ барбыт чахчылара эмиэ баар. Бу официальнайдык командировкаламматах саллааттар. Байыаннай чаас командованиета ыыппыт да буоллаҕына, уоппуска ылан, бэйэтин баҕа ѳттүнэн барбыта диэн мэлдьэhэн кэбиһиэн сөп.

ЛНР, ДНР сэриилэрэ юридическай ѳттүнэн сокуоннайа суохтар. Онон саха уолаттара харчыга наёмник быhыытынан көрүллүөхтэрэ. Сокуоннайа суох формированиеҕа кыттыы – РФ Холуобунай кодексын 208 ыст. ыйыллар холуобунай буруйу оҥоруу. Бэйэтин дойдутугар буолбакка, атын дойдуга сэриигэ наймылаhыы – РФ ХК 359 ыст. ыйыллар холуобунай буруйу оҥоруу.

Саха уолаттара ѳлѳр түгэннэригэр уустук, ылбычча быhаарыллыбат быһыы-майгы үѳскүүр. Өлүктэрин аҕалыыны Россия Оборонаҕа министиэристибэтэ үбүлүө суоҕа. Онно ѳлбүт сирдэригэр сыбаалкаҕа саба тарыйыахтара. Чопчу кѳмүллүбүт сирдэрин этиэхтэрэ суоҕа. «Саха уола Украинаҕа сэриилэhэ сылдьан ѳллѳ» диэн биллэрии кэлиэ суоҕа. Сураҕа суох сүтүѳхтэрэ. Өллѳхтѳрүнэ, кинилэр ааттарыгар суруллубут докумуону, бааҥҥа уурунууларын, массыынаны, дьиэни тѳрѳппүттэригэр, кэргэнигэр эбэтэр оҕотугар кѳhѳртѳрѳр туhугар, кинилэр «сураҕа суох сүппүт» диэн суут уурааҕын хас эмэ сылы быһа муҥнанан ситиһиэхтэрэ.

Контрагынан сулууспалааччы ЛНР, ДНР сиригэр-уотугар ѳллѳҕүнэ, страховката, биирдэ бэриллэр босуобуйата уонна иитэр киhини сүтэрии иhин тѳлѳнѳр биэнсийэ тѳрѳппүттэригэр, ойоҕор биитэр оҕотугар ананыа суоҕа. Бааһыран эчэйдэҕинэ, страховка тѳлѳммөт, байыаннай инбэлиит босуобуйата анаммат. Маны барытын тѳрѳппүттэр билиэхтээхтэр.

Сүбэлиибин: «Сокуону уонна быраапкын бил» диэн хомуурунньугу библиотекаттан уларсан ааҕыҥ уонна байыаннай чаас командирыгар уолгут бирикээстэрин, контракка дуогабарын бигэргитиллибит куопуйатын ыыталларын модьуйуҥ. Кэлин туруорсаргытыгар, ирдэhэргитигэр наада буолуоҕа.