БРНФ конференциятыгар ахсынньы 4 күнүгэр социальнай эйгэҕэ, экономикаҕа уонна олох хаачыстыбатын тупсарыы дьаһалларыгар государственнай политика сүрүн хайысхаларынан биэс мөккүөһэр площадкалар үлэлэрэ тэриллибиттэрэ, ол иһигэр Россия президенэ Владимир Путин «ыам ыйынааҕы» уураахтара киирсэллэр.

«Үөрэх уонна культура омуктар сөп түбэсиһиилэрин төрүттэрин быһыытынан» диэн площадка модераторын быһыытынан БРНФ Киин штабын чилиэнэ, РФ Общественнай палаататын чилиэнэ Любовь Духанина тыл эттэ.

БРНФ Киин штабын сопредседателэ, парламент культураҕа кэмитиэтин баһылыга Станислав Говорухин аныгы общество сүрүн кыһалҕатынан билиҥҥи ыччат үөрэҕин таһыма намыһаҕынан быһаарда.

Үөрэх эйгэтигэр омуктар икки ардыларыгар сыһыаннар хайысхаларын Алена Атласова ырытта. «Бүгүн Россия омугун биир кэлим национальнай бэйэни билиниитин оҥоруу сүрүн соругунан буолар. Патриотизм, омуктар икки ардылалыгар иллэһии олус суолталаахтар, туох-ханнык иннинэ үөрэхтээһиҥҥэ. Хомойуох иһин, биһиги сонуннар халҕаһаларыгар социальнай дьаралыктар баһыйалларын билинэргэ күһэллэбит – гастарбайтердар, миграннар диэн. Патриотизм оҕо эрдэхтэн иитиллиэхтээх, онон итинэн салайтаран, мин санаабар, этнокультурнай үөрэхтээһин биир кэлим федеральнай кээмэйдэрин оҥорор уолдьаста. Ити чопчу регионнарга олус суолталаах, ордук аҕыйах ахсааннаах төрүт омуктар олорор сирдэригэр», - диэтэ Атласова.

Москваҕа ахсынньы 4-5 күннэригэр ыытыллар БРНФ «Форум действий» конференциятыгар дойду регионнарыттан 1 000 кэриҥэ бэрэстэбиитэллэр кытталлар. Мөккүөр площадкаларыгар былаас федеральнай толоруулаах органнарын салайааччылара, айар интеллигенция бэрэстэбиитэллэрэ, экспертэр кэлиэхтэрэ. Ахсынньы 5 күнүгэр, пленарнай мунньахха, форум резолюциятын ылыныахтара.