Куонкурус республикатааҕы балаһыанньаҕа олоҕуран оҥоһуллан, түөрт түһүмэҕинэн барда: бэйэни билиһиннэрии, талаан, бүлүүдэ, киэһээҥҥи былааччыйалаах дефиле. Талааҥҥа Альбина Дьячковская “Сибэккилэр” диэн ырыатын сэргэ, оҕолор кини тикпит сахалыы, аныгылыы истииллээх таҥастарын кэтэн тахсан хаамсан көрдөрдүлэр. Саргылаана Пономарева дьиэ кэргэнинээн араас сыллардааҕы үҥкүүнү толордулар. Наталья Флегонтова нарын вальсы бэлэхтээтэ. Марфа Кардашевская саха музыкальнай инструменнарын туһанан, фольклорнай толоруунан киирдэ. Эльвира Данилова кыыһынаан узбек үҥкүүтүн үҥкүүлээтилэр. Дария Маркова хомустаата уонна “Сардаана» үҥкүүнү толордо. Сюзанна Захарова, Екатерина Хоютанова ырыаларын бэлэхтээтилэр. Бүлүүдэлэр үксэ саха маанылаах аһыттан -- убаһа этиттэн, хаттатыттан, хааныттан уонна балыктан оҥоһуллубут композициялар буоллулар. Бу бүлүүдэлэр аукциоҥҥа турдулар. Киирбит үп Аэлита Седалищеваҕа көмө быһыытынан бэрилиннэ.

Салгыы кыттааччыларбыт киэһээҥҥи былааччыйаны кэтэн, нарын көстүүнү бэлэхтээтилэр.

Дьүүллүүр сүбэ быһаарыытынан, түмүк маннык буолла: “Сандалы Хотун” – Марфа Кардашевская, “Мааны Хотун” – Сюзанна Захарова, “Уран Хотун” – Дария Маркова, “Сайдам Хотун” – Эльвира Данилова, “Ийэ Хотун” – Наталья Флегонтова, “Алаһа Хотун” – Екатерина Хоютанова, “Талба Хотун” – Саргылана Пономарева, “Далбар Хотун” – Альбина Дьячковская.

Кыайыылаах Альбина Дьячковскаяҕа 40 тыһ. солк. сертификат туттарылынна уонна улуустааҕы Далбар Хотун куонкуруска кыттар путевка бэрилиннэ.