Аан дойдутааҕы гимназиада — уон түөрдүттэн уон сэттэлэригэр диэри саастаах үөрэнээччилэр Олимпийскай оонньуулара, күрэхтэһиини Норуоттар икки ардыларынааҕы үөрэнээччилэр спортивнай федерациялара түөрт сылга биирдэ ыытар.

Никифорова үс хапсыһыыны ыытта. Бастаан кини Суринам дзюдоисткатын Фоен Шаноны икки бастыҥ быраҕыыны оҥорон кыайда. Бразилия спортсменката Каролина Барбеироттины кытта хапсыһыы олус тыҥааһыннаах буолла, утарсааччылартан ким да түмүктээх дьайыыны оҥорбото. Биһиги биир дойдулаахпыт балайда көхтөөх буолан, кыайыыны ситистэ.

Финалга Ньургуйаана француз дзюдоисткатын, Европа вице-чемпионката Инесса Превоты кытта көрүстэ. Утарсыыга француженка баай уопута баһыйда. Кини кыайыыны бэйэтигэр сурунна.

Баҕар, Никифорова аттыгар кини тус тренерэ Дамдин Гамбодорж баара эбитэ буоллар, чемпионка буолуон сөп этэ, ол эрээри спорт араастаах. Ньургуйаананы ситиһиитинэн эҕэрдэлиибит.