- Кулун тутар 6 күнүгэр мас тардыһыытыгар улуус чемпионата буолла. Барыта 70 киһи кытынна. Уолаттары уонна эр дьону сэргэ кэрэ аҥардар икки ыйааһыҥҥа күрэстэстилэр. 62 кг уруккута улууска кэрэчээнэлэр куонкурустарыгар бастаабыт Мария Попова (Кэскил) чемпион үрдүк аатын сүктэ.
- 70 кг үөһэ ыйааһыҥҥа спорт маастарыгар кандидат Надежда Христофорова (Мэҥэ Алдан) соҕотох утарылаһааччытын кыайан эмиэ бастаата.
- Кулун тутар 7 күнүгэр сарсыарда 10 чаастан киэһэ 21 чааска диэри аны волейболга күрэхтэһии буолла. Дьахталларга аҕыс хамаандаттан быһаарыылаах киирсиигэ Тополинай уонна Хаандыга хамаандалара күөн көрүстүлэр. Бастакы партияҕа тополинайдар 18:8 кыайан иһэн, дьэ булан кыайтардылар. Нууччалыы, сахалыы, эбээннии тылынан өйөөн хаһыытаһан көрдүбүт да туһа суох. Иккис партияҕа эмиэ аҕыйах очконан кыайан иһэн ситтэрэн, эрбии тииһинии эрийсэн баран, 23:25 ахсаанынан хоттордулар. «Хайдах кыайтардыгыт?» - диэтэххэ сорохторо күлсэллэр эрэ, «Аныгыскы сырыыга кыайыахпыт», - дэһэллэр. Кинилэр ортолоругар икки, түөрт оҕолоох ийэлэр бааллара, онон бириэмэлэрин кэмчилээн түүннэри айаннаан кэлэн баран, күрэхтэһээт эмиэ түүннэри дойдулаатылар.
- Эр дьоҥҥо тоҕус хамаанда кытынна. Финалга Теплай Ключ уонна Хаандыга хамаандалара көрүстүлэр. Ыһыылаах-хаһыылаах, бара сатаан кыланыылаах оонньуу түмүгэр бастакы икки партияҕа эр-биир хотуһан баран быһаарыылаах үһүс партияҕа хаандыгалар 18:16 ахсаанынан кыайдылар.
- Дьахталларга да, эр дьоҥҥо да үһүс миэстэни хайа-геологическай техникум хамаандалара ыллылар.
- Кириэс Халдьаайы курдук биир улахан нэһилиэк хамаандата бэһис эрэ буолла. Оонньооччулар: «Конкретно кыайтардыбыт. Мөлтөх хамаанданы кыайан баран үөрэбит ээ. Хаандыгаларга биһиги оскуолаҕа үөрэнэрбит саҕана оонньообут оҕонньоттор бааллар», - диэн мөлтөхтүк оонньообуттарын син билинэллэр. Кыайтарбыт дьон хайыахтарай, эрдэ хомунан дьиэлээтэхтэрэ дии. Хата кэргэттэригэр бырааһынньыгынан улуус кииниттэн сибэкки атыылаһан бардылар.
- Кыайыылаахтарга барыларыгар мэтээллэри, грамоталары, дьахталларга өссө минньигэс бириистэри туттардылар.
- Бастыҥ оонньооччу Саргылаана Старостина (Тополинай), Андрей Станкус (Теплай Ключ), «Бастыҥ көмүскээччи» Людмила Миронова (техникум), Александр Сополев, «Бастыҥ быһааччы» Дарья Золотаренко (иккиэн Хаандыгаттан), Николай Каратаев (техникум), «Бастыҥ оонньотооччунан» Матрена Яковлева (Мэҥэ Алдан) уонна Владимир Лапин (Хаандыга) буоллулар.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети