Норуот уонна фольклорнай айымньы «Малахитовая шкатулка» аан дойдутааҕы конкурс-фестивала сэтинньи 22-23 күннэригэр ыытылынна. Тэрийээччилэрэ - Санк-Петербург Сокуону ылынар мунньаҕа, Ленинград уобалаһын культураҕа кэмитиэтэ, Санкт-Петербург правительствотын үөрэххэ кэмитиэтэ. Конкурс-фестивалга 117 киһи кытынна, этно-фольклорнай уонна народнай ырыаны толордулар. Аан дойдутааҕы ытыктанар дьүүллүүр сүбэ Варя Аманатоваҕа саха ырыатын ситиһиилээхтик толоруу иһин 2-с степеннээх лауреат аатын иҥэрдэ.

«Золотой голос» - Россия эстрадатын вокалист-солистарын аан дойдутааҕы конкурса - сэтинньи 26-28 күннэригэр Москваҕа буолла. Манна Россия араас регионнарыттан, атын дойдулартан (Казахстан, Татарстан, Башкортостан, Украина, Азербайджан) кытыннылар.

Конкурсу ЭКТВ продюсерскай киин, «Останкино» эстрада, киинэ уонна телевидение оскуола-студията Россия Федерациятын Общественнай палаатын уонна Music Boks телеканал өйөбүллэринэн тэрийэн ыыттылар. РФ араас регионнарыттан сайабылыанньа биэрбит 1700 солистартан конкурсаннарынан 170 киһи киирдэ, кинилэр кытаанах тургутууну аастылар.

Варя Аманатова 114 нүөмэринэн киирдэ. Сэтинньи 27 күнүгэр, Журналистар Дьиэлэригэр бастакы талар конкурс буолла, онно кини 3 ырыаны: «Айан киhитэ», «Үс кутум», «Хуторянка» толордо. Сэтинньи 28 күнэ - үһүс, саамай долгутуулаах уонна эппиэтинэстээх күн — конкурс финала. Кыттарга быраабы 30 киһи ылла. «Золотой голос» саамай күүстээх кыттыылаахтарын ортолоругар Варя Аманатова киирдэ.

Аан дойдутааҕы дьүүллүүр сүбэҕэ РФ искусствотын деятеллэрэ, Россия эстрадатын мэтрдара бааллар. Дьүүллүүр сүбэ бэрэссэдээтэлэ - СССР народнай артыыһа Иосиф Кобзон, жюри састаабыгар Ирина Отиева, «Моральный кодекс» бөлөх кыттыылааҕа Александр Солич, «Премьер-министр» бөлөх солиһа Слава Бодолика, Music Hayk бэрэстэбиитэлэ - Тимати продюсерскай киинэ, 1 канал «Голос» бырайыагын финалистара Анастасия Спиридонова, Артем Хачарян, Маргарита Позоян, Арцвик Арутюнян, биллиилээх музыканнар уонна продюсердар.

Конкурс финала ВВЦ ВДНХ павильонугар буолла. Musuc Box канаал уһулла. Финальнай толоруулар кэннилэриттэн конкурс түмүктэрин таһаардылар уонна номинациялары иһитиннэрдилэр: Гран-при, 1, 2, 3 степеннээх лауреаттар, 1, 2, 3 степеннээх дипломаннар, ону таһынан 7 анал бириистэр. Саха сириттэн кэлбит ырыаһыт конкурс биир бочуоттаах миэстэлэриттэн биирдэстэрин ылла - 2 степеннээх лауреат буолла. Варя Аманатова саха эстрадатын солистарыттан бастакынан маннык Москваҕа, Санкт-Петербурга ыытыллыбыт аан дойдутааҕы фестиваль-конкурска 2 степеннээх лауреатынан таҕыста.

Варяны уонна театр коллективын ситиһиинэн эҕэрдэлиибит.