Кинилэр олохтоох дьаһалта баһылыга Анна Сысоева ыҥырыытынан кэлбиттэр. Көрсүһүүгэ сүүсчэкэ киһи сырытта, олохтоох дьаһалтаттан Алексей Гоголев, Алдан Стрекаловскай, Анна Гаврильева кыттыыны ыллылар.

Виссарион Игнатьевич өрөспүүбүлүкэ тыатын хаһаайыстыбатын ааспыт сыллааҕы үлэтин түмүктэрин туһунан сиһилии кэпсээтэ. Ол курдук, кэнники түөрт сылга аан бастаан оту бэлэмнээһин былаана 104 % толоруллубут, о.э. 522 тыһ. тонна от оттоммут. Өрөспүүбүлүкэҕэ ынах сүөһү ахсаана аҕыйыы турар, ордук ыал кэтэх хаһаайыстыбатыгар. Сүөһү уопсай ахсаанын 50 % кэтэх хаһаайыстыбаларга баар. Ынах ахсаана аҕыйаан, үүтү ыаһын уонна эти оҥоруу былаана туолбатах. Дьиэ табатын ахсаана эмиэ аҕыйаабыт — өрөспүүбүлүкэ үрдүнэн 165 тыһ. таба хаалбыт. Онтон сылгы ахсаана эбиллэн 171,1 тыһ. төбөҕө тиийбит. 2014 сыл түмүгүнэн 21 млрд 800 мөл солк. суумалаах тыа хаһаайыстыбатын бородууксуйата оҥоһуллубут.

Саха Өрөспүүбүлүкэтин Бэрэсидьиэнин ыйааҕынан бигэргэммит тыа сирин бигэ сайдыытыгар туһуламмыт кэлим дьаһаллары олоххо кллэрии салгыы ыытыллыбыт. Ол курдук, тыа сиригэр 38,9 тыһ. кв.м. иэннээх олорор дьиэ тутуллубут, 56,6 км. сайыҥҥы уу ситимэ тардыллыбыт, үүт сыахтара, хотоннор үлэҕэ киллэриллибиттэр.

Төһө да экономическай кризис бүрүүкээтэр 2015 сылга бюджеттан тыа сирин сайдыытыгар 7 млрд 100 мөл солк. көрүллүбүт, о.и. федеральнай бюджеттан 750 мөл солк. бэриллиэхтээх үһү. Тыа сирин олохтоохторо өр сыллаах туруорсууларынан, быйыл үүт субсидията үрдэтиллэн 3036 солк., соҕотуопкалыыр тэрилтэ атыылаһар сыаната 612 солк. буолуоҕа диэтилэр. Сылгыга субсидия бэриллибэт, сайыҥҥы фермаларга электростанция көрүллүбэт эбит.

Өссө араас бырагараамаларга, граннарга кыттыы, бизнесбылааны оҥоруу, страховкалааһын тустарынан сиһилии быһааран биэрдилэр.

Павел Петрович урут бэйэтэ ыанньыксыттаан үүтү ыаһыҥҥа өрөспүүбүлүкэҕэ рекорд олохтообут киһи быһыытынан, ынаҕы сылга 300 хонук ыахха, сүөһү боруодатын тупсарарга искусственнай сиэмэлээһини киэҥник туһаныхха наада, онно «Сахаплемобъединение» диэн кыахтаах тэрилтэ баар диэтэ. Е.А. Никифоров «Күөрэлээх» диэн ферма туттарбыта кэрэхсэбиллээх суол диэн хайҕаата.

Нэһилиэнньэттэн киирбит боппуруостарга барытыгар толору эппиэттэри биэрдилэр. Холобура, убаһа тириитин 500 солк. туталлар диэтилэр. Элбэх боппуруоһу Евдокия Федорова биэрдэ. Кини урут «Мукучу» сопхуоска үлэлээбит буолан, сүөһү үлэтин үчүгэйдик билэр. Эт, үүт сыанатын үрдэтэргэ туруоруста. Степан Гаврильев баһаар содулугар базата, техниката умайан көмө көрдөөтө. Онно урут 500 тыһ. солк. бэриллибит, билигин туох да суох диэн эппиэттээтилэр. Суоттуга профтехучилищеҕа ыанньыксыттары 3 ый, осеменатордары Дьокуускайга 1 ый үөрэтэллэрин эттилэр.

Кэпсэтии түмүгэр олохтоох дьаһалта баһылыга А.И. Сысоева кинилэргэ улахан махталын биллэрдэ.

Дьэ ити курдук Киин исписэлиистэрэ кыһыҥҥы суолу баттаһа кэлэн, тыа сирин олохтоохторугар сүбэлээн-амалаан, элбэҕи өйдөтөн бардылар.