Үгэскэ кубулуйбут тапталлаах күрэспит муус устар 1 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр ыытыллыаҕа. Бу иннинээҕи күн кыттааччылары сүүмэрдээһин буолуоҕа. Күрэскэ хас биирдии киһини быара суох ыытар, сүргэни көтөҕөр бэтиэхэлээх туруоруулары Сахабыт сирин нороднай театрдара, биирдиилээн кыттааччылар, театральнай кэллэктииптэр уо.д.а. бэлэхтиэхтэрэ.

«Дьээбэрэҥ» ‒ көргө-күлүүгэ сыһыаннаахтар, айылҕаттан айдарыллыбыт айар дьоҕурдаахтар түмсэн күөн көрсүһэр, күрэстэһэр, бастыҥнары талан ылар, үөрэр-көтөр түһүлгэлэригэр кубулуйбут, эдэр саҥа талааннары таба тайанан айар үлэ аартыгар үктэннэрэр, дьон-сэргэ сөбүлээн сылдьар, астына көрөр, дуоһуйа сынньанар көр-күлүү республикатааҕы күрэһэ.

Быйылгы «Дьээбэрэҥ-2015» Литература сылыгар уонна Улуу Кыайыы 70 өрөгөйдөөх сылыгар анаан ыытылларынан, кыттааччылар репертуардарыгар литература классиктарын айымньыларынан, эбэтэр кинилэргэ олоҕурбут туруоруулар уонна сэриини, фашизмы утары, эйэлээх-дьоллоох олоҕу, доҕордуу сыһыаны уруйдуур айымньыларынан кыттыы ордук биһирэниэҕэ.

Бу эрэ күн кыттааччылар талан ылбыт көрүҥнэригэр, ол эбэтэр көрдөөх кэпсээн, хоһоон, чабырҕах, үгэ, монологтар, сценкалар, конферансье, комедияттан быһа тардыылар, көрдөөх ырыалар, үҥкүү, пародия, пантомима, клоунада, фокус жанрдыранынан туруоруулары көрдөрүөхтэрэ.

Сиһилии тэрийэр кэмитиэттэн 32-86-62, 8964 423 03 45 телефоннарынан ыйыталаһыҥ.