Кыһыҥҥы өттүгэр атыыһыттар будулҕан тымныыттан чаҕыйбакка, эттэрин, арыыларын, балыктарын уһун эрээттэринэн тэлгэтэр эбит буоллахтарына, билигин күргүөмүнэн ырыынак дьиэтин иккис мэндиэмэнигэр көспүттэр. Кинилэр оннуларыгар хортуоппуйу, оҕуруот аһын, фруктаны атыылааччылар кэлбиттэр.

Хаҥаласка, Горнайга «кыстаабыт» хортуоппуйу биир киилэтин 60 солкуобайынан быспыттар. Көрүүтэ-харайыыта табыллыбыт буолан, көстүүтүнэн соҕуруу регионнартан аҕалыллыбыт сибиэһэй хортуоппуйу кытары биир кэккэҕэ турар.

Ынах этин көрүҥүттэн көрөн 350-500 солкуобайынан сыаналаабыттар. Саас айылҕаҕа, даачаҕа тахсааччы элбээн, шашлык этин сыаната үрдээбит. Биир киилэ сибиинньэ этэ 400 солк. буолбут (шашлык). Чурапчы арыыта 480, иэдьэгэй 280, дьоҕус бааҥкаҕа кутуллубут сүөгэй 350-400 солкуобайга атыыланар.