«Сайсарыга» сыана да сыана!..

Билигин ырыынакка атыы-эргиэн тигинээн олорор. Суол аһыллан, ыраахтан-чугастан эт уонна балык арааһа кыстанан турар. Ырыынагы биирдиилээн эргиэмсиктэр тутан олорор буоланнар, сыананы бэйэлэрэ олохтууллар.
Олохтоох сүөһү этэ баччаларга арыый дэлэйэн ылар. Атын кэмҥэ эргиэмсиктэр обургулар Алтайтан, Калмыкияттан, ону ааһан Белоруссияттан аҕалыллыбыт эти «олохтоох», «маннааҕы» диэн атыылыыллар. Чыпчылыйбакка тэрбэччи көрөн туран «Чурапчыттан» биитэр «Мэҥэттэн» дииллэр. Эти көрүҥүттэн, тас көстүүтүттэн сатаан быһаарбат атыылаһааччы албыҥҥа киирээхтиир. Аны бу Алтайбыт да этэ олох даҕаны омук дойдуларыттан аҕалыллар эбит.
«Сайсарыга» билигин эти таһынан, кутуллубут хаан, быар, харта, сүрэх, туйах атыыланар. Манна күһүҥҥүттэн сыана улаханнык халбаҥнаабакка турар. Кутуллубут хаан киилэтэ 1200 – 1300 солк., быар 2000 солк., харта 800 солк. тахса.

Убаһа иһэ – 8000 солк.

Атыыһыттар биир кэм: «Миигиттэн атыылаһыҥ! Кыратык сыанатын түһэриэм», – диэн ыраахтан хаһыытыы-ыҥыра олордоллор да, «Сайсарыттан» бэйэбит хармааммытыгар эппиэттиир бородууксуйаны булбакка, Интернеккэ, хаһыакка тахсар биллэриилэри үөрэтэн көрдүбүт. «Чурапчыттан күн ахсын убаһа этин аҕалабыт. Сыаната удамыр», – диэн биллэриинэн эрийэ сырыттыбыт. 1 киилэтин 400 солк. быспыттар. Иһи 8000 солк. атыылыылларын билээт, тута атыылаһарбытын эттибит. Сарсыҥҥытыгар болдьоммут кэмигэр эппит Чурапчыттан айаннаан кэллэ. 20 киилэни 8000 солк. ыллыбыт. Маны таһынан иһин 8000 солк. Хаттата, хаана, быара сууйуллан, ыраастаныллан тус-туһунан угуллубуттар. Хаанын икки «роса» бытыылкаҕа куппуттар.
Аны аҕыйах хонугунан Ватсапка Чурапчы убаһатын этин киилэтин 350 солк., иһин 5000 солк. атыылыыбыт диэн иһитиннэрии кэллэ. Онон, дьэ ыксаан атыылаһаммыт, 3000 солк. ороскуотурдубут. Чэ, инньэ диэн хайыахпытый, кылаабынайа, дьиэбитигэр босхо аҕалан биэрдэхтэрэ. Баҕар, чэпчэкитик атыылыыр дьон суолун-ииһин ороскуотугар эбии харчы ылаллара буолуо диэн санаабытын алы гынныбыт.
Көрдөөбүт көмүһү булар

Илин эҥэр уонна киин улуустарга убаһа, ынах этин сыаната сэтинньи саҕаланыыта түһэ сылдьыбыта. Холобур, убаһа этин олоччу биитэр аҥарын киилэтин 300 – 350 солк. атыылаһыахха сөбө. Ол эрээри Дьокуускай куорат маҕаһыыннарын кэрийдэххэ, арыый да удамыр сыанаҕа эти булуохха сөп. Холобур, сорох маҕаһыыннарга Уус-Алдан ынаҕын этэ 300 солк., убаһатын этэ 380 солк. атыыланар. Онон көрдөөбүт көмүһү булар дииллэринии, ырыынагы үөрэтэн көрүөххэ наада. Бэйэ хармааныгар сөптөөх бородууксуйаны булар туһугар.

Москваҕа — 1000 солкуобай!..

Интернеккэ «ВКонтакте» социальнай ситимҥэ Чурапчы, Дьааҥы убаһатын этин атыылыыр «Жеребятина из Якутии» диэн анал бөлөх баар. Бу бөлөх Москва куорат олохтоохторугар биир киилэ эти 1000 солк. атыылыыр эбит.

Сиһилии «Саха сирэ» хаһыат б.дь. ахсынньы 4 күнүнээҕи нүөмэригэр аах.