Күрэхтэһии сүрүн сыалынан-соругунан нэһилиэктэр ыччаттарын доҕордуу сыһыаннарын бөҕөргөтүү, чөл олоҕу пропагандалааһын, улуус социальнай, экономическай сайдыытыгар бэйэ кылаатын киллэрии, саҥа үлэлээн эрэр ыччат лидердэригэр инникилээх үлэҕэ оҥкулларын тэринэн, саҥа саҕахтары арыналларыгар көмөлөһүү буолар.

Тэрээһин сибиэһэй салгыҥҥа „Убойнай футбол“ күрэхтэһиинэн саҕаланна. Икки сиринэн 5-тии хамаанданан арахсан кытаанах киирсиилэр буоллулар. Бастакы бочуоттаах миэстэни ЧГИФКиС уолаттара ыллылар. Иккискэ Төлөй хамаандата таҕыста. Үһүс миэстэни Чурапчы сүүмэрдэммит хамаандата ылла. Бу кэмҥэ хамаандаларыгар ыалдьа кэлбит кыргыттар хаатыҥка быраҕыытыгар күрэхтэстилэр. Манна Мындаҕаайы хамаандатын лидерэ Ольга Егорова күрэстэһээччилэрин ырааҕынан хаалларан бастаата.

Салгыы „Лидер уонна кини хамаандата“ күрэсбуолла. Дьүүллүүр сүбэҕэ ыччат политикатын кылаабынай специалиһа С.С. Ноговицын, Ыччат уонна дьиэ кэргэн социальнай психологическай киинин сэбиэдиссэйэ С.А. Миронова, Предпринимателлэри өйүүр фонда Чурапчыгабэрэстэбиитэлэ С.В. Атласова үлэлээтилэр.

Бастакы түһүмэх - хамаанданы билиһиннэрии. Иккис түһүмэх - бэриллибит тиэмэҕэ бырайыак толкуйдааһын. Билиҥҥи кэмҥэ тыҥаан турар сытыы боппуруостарга, саҥа арыйыыларга хамаандалар бэйэлэрин санааларын эттилэр. Бириэмэ кылгаһынан дириҥ ырытыһыы толору кыайан тахсыбата да буоллар, саҥа идеялар этилиннилэр, сүрүн сыал-сорук туруорулунна. Салгыы хамаандалар лидердэрэ «Мин тыа сирин талар сэттэ биричиинэм» диэн тиэмэҕэ араатардыыр талааннарын көрдөрдүлэр, бэйэлэрин санааларын киэҥ истээччигэ хайдах тиэрдэллэрин дьүүллүүр сүбэ сыаналаата. Кыттааччылар тыа сирин талар сэттэ биричиинэҕэ тыа сиригэр сайдыы суолун көрдүлэр, төрөөбүт дойдугар үлэлиир үчүгэйин, бэйэ оҥорон таһаарбыт үрүҥ аһа, сыалаах этэ туохха да тэҥнэспэтин ыйдылар. Кырдьыга даҕаны, күөх хонууга күөлэһийэ оонньоон, иҥэмтиэлээх аһы аһаан, өйдүүн-санаалыын чөл туруктаах ыччаттаах дойду сайдар эрэ кэскиллээх.

Бу курдук өйү-санааны уһугуннаран, саҥаны айарга-тутарга санаа сааһыланныбыт. Дьүүллүүр сүбэ күрэс түһүмэхтэринэн түмүктэри таһаарда. «Лидер уонна кини хамаандата» күрэс кыайыылааҕынан Одьулуун нэһилиэгиттэн «Дьулуур» хамаанда ааттанна. Салайааччылара Сардаана Винокурова. Оттон Бахсы ыччатын түмсүүтүн салайааччы Лидия Свешникова «Бастыҥ лидеринэн» ааттанна.