Олунньу 14 күнүгэр Чурапчы ыччата «Таптал баар буолан» диэн тэрээһини Улуу Кыайыы 70 сылыгар анаата. Бу күн улуустааҕы ыччат политикатын отдела уонна “Маарыкчаан ыччатттара” общественнай түмсүү көҕүлээһининэн 50 сыл бииргэ олорбут үбүлүөйдээх дьиэ кэргэттэргэ сэмэй бэлэх тутуурдаах Чурапчы улууһун араас муннуктарыгар ыалдьыттаатылар, чиэстээтилэр.

Чурапчы киин болуоссатыгар тымныыны аахсыбакка, бу күн олохторун холбообут эдэр сүрэхтэри Чэмэлиинэ, Тимофей Ильиновтары уонна Ирина, Анатолий Тарасовтары ыҥыран эҕэрдэлээн, кэрэ кэмнэрин үйэтитэн хаартыскаҕа түһэрдилэр.

Ону тэҥэ эйэлээх олоҕу уруйдуу, ыраас тапталы мэктиэлии киэҥ халлааҥҥа таптаһар бары сүрэхтэр салгыҥҥа көтөр сүрэх фонардары ыыттылар. Көрүөххэ кэрэ көстүү уһун үйэлээх тапталы, эйэлээх олоҕу мэктиэлии халлаан устун оргууй көтө турда.