Томпоҕо скандинавскай хаамыынан дьарыктанааччылар тэрээһиннэрин Улуу Кыайыы 70 сылыгар анаатылар

Скандинавскай хаамыынан дьарыктанар оройуон киинин дьахталлара муус устар 5 күнүгэр Хаандыга-Сайдыы-Хаандыга хайысханан марш-бросок оҥордубут. Бу тэрээһиммитин Улуу Кыайыы 70 сылыгар анаатыбыт. Көҕүлээччинэн скандинавскай хаамыынан дьарыктанааччы, киин библиотека оҕо отделын кылаабынай библиотекара ИринаКолодезникова буолла. Кинини эмиэ бу көрүҥүнэн дьарыктанааччылар өйөөтүбүт. Барыта 18 дьахтар кытынна. Кэрэ аҥардар саастарын ыйар сатамньыта суох да буоллар, бу сырыыга иһитиннэрэбит: саамай эдэрбит 43 саастаах, саамай саастаахпыт 69 саастаах. Кыттааччылар ортолоругар библиотекардар Жанна Шунгуева уонна Римма Захарова, элбэх хайысхалаах гимназия учууталлара Наталья Оконешникова уонна Надежда Бурцева, ОДьКХ ГУП Томпотооҕу филиалын экономиһа Мария Иванова, Сбербаан үлэһитэ Акулина Колодезникова, Нэһилиэнньэ дьарыктаах буолуутун киинин бухгалтера Римма Николаева, "Томпофарм" специалиһа Елена Сокольникова, СЭС үлэһитэ Розалия Шмакова, пенсионердар ЛарисаБулдакова (61 саастаах) уонна Любовь Винокурова (62 саастаах) бааллар.
Марш-бросок иннинэ Кыайыы болуоссатыгар хаартыскаҕа түһүү буолла. Бастаан Алдан мууһугар киирэн Хаандыгатааҕы хайа-геологическай техникумун юриһа Екатерина Шарина сахалыы сиэринэн алаадьы уурда. Кини Мэҥэ-Хаҥалас оройуонуттан төрүттээх, Дьокуускайга олорбута уонна үлэлээбитэ, онтон техникумҥа үлэлиир кыыһыгар көмөлөһөөрү кэргэнинээн көһөн кэлбиттэр. Екатерина Михайловна бастаан көннөрү хаамыынан дьарыктаммыт, онтон 2014 с. скандинавскай хаамыыга көспүт. Сарсыарда 5 ч. турар, 30 кыраадыстаах куйаас да, тохсунньу тоһуттар да тымныыта буоллар күҥҥэ 5 км хаамар. «Олорор үлэлээх дьоҥҥо бу олус туһалаах», - диир.
Биһиги онтон аны сэрээккэлээтибит, эмиэ да сорохтор православнай таҥара дьиэтин күөнүгэр хаартыскаҕа түстүлэр. Колонна иннигэр биир бастакынан саамай аҕа саастаахпыт Клавдия Алексеевна Мексярова барда. Кини 40 сыл геологынан үлэлээбитэ, сайыҥҥы өҥүрүк куйааска аатырбыт Сэттэ Дабааны хаста да дабайбыта. Бу хайаны дабайыыга кырата 6 чаас барар. Билигин хайа-геологическай техникум минералогическай музейыгар директорынан үлэлиир. Скандинавскай хаамыынан дьарыктаммыта сыл кэриҥэ буолбут, кыһын тымныыга күҥҥэ 3,2 км хаамара, сылааска 5 км диэри дистанциятын уһаппыт. Клавдия Алексеевна муус устар 5-гэр, Геолог күнүгэр, стартка тахсан идэлээх бырааһынньыгын бэлиэтээтэ.
Оройуон дьаһалтатын материальнай-техническэй хааччыйыы управлениетын үлэһитэ Екатерина Захарова тилэҕин уҥуоҕун тоһутан 2 ый анараа өттүгэр эрэ гипсэтин устубута. Ол да буоллар марш-бросокка кыттар баҕа санаата баһыйан дистанцияны толору хаамта.
Биһиги туох түбэһэринэн таҥныбыппыт. Дьиҥинэн, бу көрүҥүнэн дьарыктанарга барыта аналлаах буолуохтаах, хаалыктан саҕалаан рюкзак-суумкаҕа тиийэ. Холобур, "Орбита" станция электромеханига Антонина Харайданова дьарыктанарыгар анаан уопсайа 20 тыһ. солк. суумаҕа хаалык, атах таҥаһа, куртка, көстүүм, бэргэһэ, саал былаат ылыммыт.
Марш-бросок кыттыылаахтара спорт атын көрүҥүнэн дьарыктамматтар, арай сорохторо доруобуйа бөлөҕөр сылдьыбыттара. Клавдия Мексярова уонна Лариса Булдакова эрэ бэтэрээннэр күрэхтэһиилэригэр садуобаҕа, дуобакка уонна саахымакка кытталлар. Бөлөхпүтүгэр саҥа саҕалааччылар эмиэ бааллар. Скандинавскай хаамыынан дьарыктанар дьахталларга Сбербаантан Светлана Козакова уонна социальнай-культурнай эйгэ управлениетын спортка специалиһа Дмитрий Сидоров кыттыстылар.

Алдан өрүһүнэн, тыанан субуллар 8 км уһуннаах массыына суолун кытыытынан хаамтыбыт. Миигин «Корреспондент киһи бартыһааннар хамандыырдарын курдуккун. Ол киниттэн баран интервьюта ыл, инникилэргэ эт, кэнникилэри көр», - дииллэр, ону толоробун, аны ватсабынан кэлэр биир дойдулаахтарбыт спортивнай ситиһиилэрин кэпсии диэн төттөрү-таары биэтэҥниибин. Сайдыыга 1,5 чааһынан тиийдибит. Аҕа дойду Улуу сэриитин кыттыылаахтарын пааматынньыктарыгар хаартыскаҕа түстүбүт, олохтоох СКК сылаас чэй истибит, илдьэ барбыт аспытынан үссэннибит.
Быйыл икки поэт-фронтовик юбилейа буолар: Константин Симонов төрөөбүтэ 100 сыла уонна Александр Твардовскай төрөөбүтэ 105 сыла. Биһиги кинилэр хоһооннорун аахтыбыт, "Катюша" уонна "Хайыһар" ырыалары ыллаатыбыт. "Дискотека-80" ностальжи музыкатынан 20 мүнүүтэ устата ис сүрэхтэн үҥкүүлээтибит уонна төттөрү айаннаатыбыт. Төннөрүбүтүгэр бириэмэбит арыый уһаан биэрдэ да бары этэҥҥэ кэллибит. Сорохтор сылайдаллар даҕаны, дуоһуйууну ыллылар. Сыалбытын ситтибит, сибиэһэй салгынынан тыынныбыт, күүспүтүн-уохпутун бэрэбиэркэлэннибит.
Биһиги аны ыам ыйын 9 күнүгэр марш-бросок оҥорор санаалаахпыт. Биһиэхэ кыттыһыан баҕалаахтар элбиэхтэрэ диэн эрэнэбит.