Ол курдук, аан дойдутааҕы Дьокуускай аэропордун базатыгар тымныынан тургутууну саамай киэҥник тарҕаммыт Boeing 737 кыараҕас фюзеляжтаах реактивнай пассажирскай самолёт уонна саҥа Boeing 787 Dreamliner — кэтит фюзеляжтаах икки двигателлээх реактивнай пассажирскай самолёт баралларыгар дуогабар түһэристилэр.

Boeing 737 көтөр аал тургутуутун үлэлэрэ кэлэр сыл тохсунньутун иккис аҥарыгар, оттон Boeing 787 Dreamliner – олунньу саҥатыгар ыытыллыахтара диэн былааннаатылар. Тест тургутуута биэс үлэ күнүн устата ыытыллара кэтэһиллэр. Boeing 737 самолету тургутууну ыыта Дьокуускайга хампаанньа 20 бэрэстэбиитэллэрэ кэлиэхтэрэ. Бэлиэтээн эттэххэ, Boeing 787 Dreamliner көтөр аалы үс төгүл элбэх специалист, ол аата 60-тан тахса Boeing хампаанньа - аан дойдуга биир бөдөҥ авиационнай, космическэй уонна байыаннай техниканы оҥорооччу бэрэстэбиитэллэрэ тургутуохтара. Boeing самолеттары тургутуу Государстволар икки ардыларынааҕы авиационнай кэмитиэт (МАК) муҥутуур намыһах температураҕа көтүтүүгэ көҥүллүүр сертификатын ылар сыалтан ыытыллар.

Эбэн эттэххэ, Дьокуускай аэропорда кэнники уон сылга авиационнай техниканы намыһах температураҕа тургутуу үгэс буолбут полигонунан ааҕыллар. Холобур, араас сылларга Саха сирин кыһынынан тургутууну «МА-60» (КНР), Bombardier DASH Q400, Boeing 747 – 8F, 757, 777, 77300 ER, 737, Airbus A319, «Сухой Суперджет 100», ИЛ-96400, ТУ-334, БЕ-200 ЧС уо. д. а. көтөр ааллар ааспыттара, диэн «Аэропорт Якутск» пресс-сулууспата иһитиннэрэр.