Өрөспүүбүлүкэ АПК-ын 300-тэн тахса үлэһиттээх улахан тэрилтэтин кэлиҥҥи балтараа сыл устатыгар салайан кэлбит Прокопий Николаев этэринэн, биэс сыллаах сайдыы былаанын ылынан, үйэ аҥардаах үбүлүөйдэрин үлэҕэ үрдүк ситиһиилэрдээх көрсөргө бэлэмнэнэллэр: ол курдук, 70 мөлүйүөннээх кирбиини куоһарар сөҕүмэр соругу туруоруннулар.

ААУо генеральнай дириэктэрэ маны аныгылыы сэбилэнии түмүгэр ситиһэргэ эрэллээх. Сарсын, ахсынньы 5 күнүгэр, Энергияны оҥорон таһаарар киини үөрүүлээх быһыыга-майгыга арыйыахтара. Оччотугар фабрика Дьокуускайдааҕы былаһаакката гаас оттуктан ылыллар итиинэн уонна уотунан бэйэтин бэйэтэ хааччынар кыахха киириэ. Көтөр аһылыгын эмиэ аҕыйах сылынан бэйэлэрин сыахтарыгар астаан-бэлэмнээн, толору хааччынарга суоттаналлар. Ону тэҥэ үүнэр сыл олунньутугар сымыыты суортуур автоматизированнай тэрили үлэҕэ киллэриэхтэрэ.

(Сиһилии «Саха сирэ» хаһыат б.дь. ахсынньы 4 күнүнээҕи нүөмэригэр ааҕыҥ).