«Көмүһү хостуур промышленность уйугун булунуор диэри эндирдээх суолу ааспыта. Оччоттон- баччаҕа диэри илиинэнэ таһар тэлиэскэлэртэн үрдүк технологиялаах тэриллэргэ диэри кэллибит», - диэтэ өрөспүүбүлүкэ баһылыгын бастакы солбуйааччы Павел Маринычев.

Россияҕа да, Саха сиригэр да көмүс промышленноһа инники кирбиигэ тутулларын кини чиҥэтэн эттэ.

Көмүс промышленноһа Саха сиригэр 1924 сыллаахха аан бастаан саҕаламмыта. Оччолорго «Якутзолото» государственнай трест тэриллибитэ. Ааспыт үйэ 70-с-80-с сылларыгар бу салааны тиэхиньикэнэн толору хааччыйбыттара. Ити түмүгэр көмүһү хостооһун кээмэйэ балысханнык элбиллибитэ. 1975-тан 1978-с сылга диэри сылга 36 тонна көмүс хостоноро.

«Якутзолото» производственнай холбоһук генеральнай дириэктэрэ Тарас Десяткин үтүөтэ-өҥөтө итиниэхэ муҥура суох улахан», - диэтэ помышленность миниистирэ Андрей Панов.

Хас эмэ уонунан сыл тухары Саха сирин көмүһү хостуур промышленноһа ССРС өҥнөөх металлургиятыгар инники күөҥҥэ сылдьыбыта уонна дойду үрдүнэн Магадан уобалаһын уонна Узбекистан кэннилэриттэн үһүс миэстэни бигэтик ылара.

1991 сыллаахха дойду ыһыллыыта, ырыынак сыһыаннаһыыларын үөскээһинэ промышленность кыаҕар дьайбыта чахчы. Приватизация содула государственнай бөдөҥ тэрилтэлэри эспитэ. Хаһааҥҥыта эрэ улахан кыамталаах экономика тутаах уонна бөдөҥ салаата бытарыйбыта уонна дьоҕус, орто тэрилтэлэртэн турар салааҕа кубулуйбута. Ити, биллэн турар, салгыы сайдыыны улаханнык харгыстаабыта.  

«Билигин өрөспүүбүлүкэ минеральнай-сырьевой кыаҕа улаатта. 20 тоннаны хостуур таһымҥа диэри тиийдибит. Кэлиҥҥи түөрт сылга кыра да буоллар эбиллии баар», - диэтэ  Павел Маринычев.