2014 сыл муус устар 7 күнүгэр РФ Президенэ Владимир Путин биһиги республикабытыгар ураты улахан суолталаах "Саха АССР тэриллибитэ 100 сылын бэлиэтээһин туһунан" уураахха илии баттаата.

Маннык этиини мин былырыын ахсынньы 23 күнүгэр буолбут Владимир Владимировичтыын тус көрсөммүн эппитим. Бу көҕүлээһин историческай суолтатын дириҥник өйдөөн, кини  кини тута өйөөбүтэ. Ол иһин мин киниэхэ улаханнык махтанабын.  

Саха автономиятын 100 сылын бэлиэтээһин бүтүн Россиятааҕы анал туруктанар. РФ судаарыстыбаннай былааһын, олохтоох салайыныы уорганнарыгар бу бэлиэ күнү бэлиэтииргэ этилиннэ. Биллэн турар, регионнар сибээстэрин, ситимнэрин бөҕөргөтүүгэ бу сүҥкэн хардыы буолуоҕа.

Уурааҕы олоххо киллэриигэ РФ бырабыыталыстыбатын тустаах дьаһала ылыллыаҕа. Өрөспүүбүлүкэ бырабыыталыстыбата федеральнай киини кытта ыкса ситимнээхтик үлэлиэҕэ. 

Саха АССР төрүттэммитэ 100 сылын бэлиэтээһиҥҥэ диэри аҕыс сыл баар, ол эрээри кэм-кэрдии дьулурҕатык суккуллан, биллибэккэ ааһыаҕа. 2022 сылга былааннаммыт үлэ  - бу бэлиэ күнү бырааһынньыктааһынан түмүктэниэҕэ. 

Биһиги элбэх омуктаах республикабыт бу үлэҕэ утуу-субуу кыттарыгар уонна ылсан өрө күрүүлээхтик үлэлииригэр баҕарабын. Экономикаҕа саҥа кирбиилэргэ өрө тахсыы, олохпутун өссө тупсарыы, дойдубут аныгы, культурнай, үөрэхтээх, күүстээх, уйгулаах буолуутун ситиһии - бу барыта бэлиэ күҥҥэ бэлэмнэнии буолуоҕа.

Ити кэмҥэ киһи ахсаанын 1 мөлүйүөҥҥэ, оҥорон таһаарыы ис валовай бородууктатын (нэһилиэнньэ 1 дууһатыгар тиксэринэн) 1 мөлүйүөн солк. диэри тириэрдии -   мин саныахпар, кыаллар уонна сатанар сорук. Дьыала ис дьиҥэр киирдэххэ, биир сыал-сорук тула санаабытын, күүспүтүн түмтэхпитинэ, оннооҕор элбэҕи кыайыахпыт-хотуохпут.