Хаҥалас улууһун уонна республика бөдөҥ 20 тэрилтэлэрэ Олонхо Ыһыаҕын ыытыыга спонсорскай үбү көрүөхтэрэ. Бюджет таһынааҕы үптэн барыта 10 мөлүйүөнтэн тахса солкуобайы угуйар былааннаахпыт диэтэ улуус баһылыга Юрий Зайцев.
Итини таһынан, улуус хас биирдии нэһилиэнньэлээх пууна сүрүн культурнай тэрээһин ыытыллар Орто Дойду этнокультурнай комплексын тупсарыыга көмөлөһүөҕэ. Номнуо сыл саҕаланыытыгар сири-уоту ыраастыырга, конкурстары, күрэхтэһиилэри ыытыыга, ыһыах ыалдьыттары арыаллааһыҥҥа көмөлөһөр волонтердар хамаандаларын таҥыы ыытыллыаҕа.
Республикатааҕы тэрийэр кэмииссийэ бэрэссэдээтэлэ Феодосия Габышева общественность көмөтө суох үлэ кэмииссийэтин эрэ күүһүнэн бэлэмнэнэр үлэ кээмэйин сатаан үмүрүтэр кыах суоҕун, онон бары общественнай тэрилтэлэри, улуус нэһилиэнньэтин барытын түмүөххэ диэн бэлиэтээтэ.
«Хаҥалас улууһугар буолуохтаах улахан культурнай тэрээһини ыытарга анаан тутуллар бары эбийиэктэр бырааһынньык кэнниттэн да духуобунай культура сайдыытыгар сулууспалыахтаахтар. Биһиги үс эбийиэк: кэнники бөдөҥ музей комплекса буолуохтаах Олоҥхо Дьиэтэ, Покровскайга Искусство Оскуолата уонна Чараҥ нэһилиэгэр Арчы Дьиэтин тутуллууларыгар сүбэлэһии ыыппыппыт, үбүлээбиппит. Хаҥаластааҕы тэрийэр кэмииссийэ Ыһыаҕы ыытыы уонна бэлэмнэнии программатын сиһилии оҥорууга үлэлиэхтээх», - диэтэ вице-премьер.
Ыһыах концепцията уонна сценарныйа өссө ааспыт сыл саҕаланыытыгар оҥоһуллубута. Ыһыах аһыллыыта умнуллубат уонна чаҕылхай буоларыгар ким да саарбахтаабат, итини республика культуратын уонна духуобунай сайдыытын миниистирэ Андрей Борисов режиссердаан туруоруоҕа. «Биһиги республикабытыгар Хаҥалас сиригэр ыытыллар Олоҥхо Ыһыаҕа культура Сылын түмүктүүр сүүнэ тэрээһининэн буолуоҕа, - диэтэ миниистир, - Буоларын курдук бөдөҥ тэрээһиҥҥэ анаммыт тутуулары аһылыыга сөп түбэһиннэрэн тутааччыбыт,онон Аал Луук Мас Орто Дойдуга ити дьайыыга ананыаҕа. Орто Дойду бырааһынньыга Ыһыаҕы уонна Олонхону саҥаттан өйдүүргэ көмөлөһүө».
Комментарии
Авторизация на сайте через социальные сети