СИА-ҕа учуонай Матвей Тяптиргянов «Кыһыл көмүс» балык Саха сирин күөллэригэр урут-уруккуттан элбэхтэ көстүбүтүн бэлиэтиир. Собо бииһин ууһугар киирэр карп балык ууһаары, тыһы балыктары бэйэтигэр тардарыгар маннык көмүс дьүһүннэнэр эбит.

" Матвей Ломпордуров туппут балыга 200 гр ыйааһыннаах, 23 см. уһуннаах. Мин бу балыгы 200 лиитэрэ уулаах буочукаҕа хоннороругар уонна күөлгэ ыытарыгар сүбэлээтим. Сотору кэминэн бу нэһилиэккэ тиийэммин балыгы үөрэтэр баҕалаахпын", - диэтэ биологическай наука доктора, ХИФУ преподавателэ Матвей Тяптиргянов. 

Матвей Матвеевич эппитинэн, маннык көмүс балыгы урут саха балыгынан ааттыыллара.

"Собо маннык кыһыл көмүс дьүһүннэнэрэ бэс ыйыттан атырдьах ыйыгар диэри салҕанар этэ. Оттон кэлин Саха сиригэр климат биллэ сылыйбытын түмүгэр балаҕан ыйыгар диэри ити кэмэ уһаан биэрдэ. Хомойуох иһин, кини личинкалара тымныыттан өлөллөр", - диэтэ Тяптиргянов.

Ыспыраапка:

Саха сирин биллиилээх ихтиолога Федор Кириллов  1948-1951 с.с. Өлүөнэ өрүс орто тардыытыгар экспедицияҕа сылдьан аан бастаан маннык «кыһыл көмүс» балыгы булбута. Ол кэнниттэн балык «Саха балыга» (Carassius carassius jacuticus Kirillov) диэн төрөөбүтү туоһулуур сибидиэтэлистибэни туппута.