Бастакы көрүҥ - спортинг - кулун тутар 18 күнүгэр «ОртоДойду» сынньалаҥ комплексыгар ыытылынна. Манна I Дьөппөн нэһилиэгин 1-кы хамаандата (баһылык С.А.Прокопьев), II Дьөппөн нэһилиэгин (1-кы, 2-с хамаандалара) бириистээх миэстэлэргэ тахсан бэргэннэрин, байанайдаах булчут буолалларын көрдөрдүлэр. Манна 2-с Дьөппөнтөн күрэстэспит Александра Румянцева сорох эр бэртэрин кэннигэр хааллартаата.

Нэһилиэк баһылыктара хамаанданы эрэ бэлэмнээн аҕалбакка, көрөөччү эрэ буолбакка, спорт биир көрүҥэр хайаан да кыттыахтаахтар диэн усулуобуйа оҥорон Хачыкаат нэһилиэгин баһылыга И.В.Оболкина дартска, I Дьөппөн баһылыга С.А.Прокопьев спортиҥҥа уонна II Дьөппөн баһылыга А.А.Варламов ханаат тардыһыытыгар кыттан дьоннорун-сэргэлэрин көҕүлээн, бэйэлэринэн холобур буолбуттара кэрэхсэбиллээх.

Үһүс сылын ыытыллар «Дартс» көрүҥү туох сыаллаах-соруктаах спартакиада программатыгар киллэрбиттэрин туһунан тэрийээччи А.В.Киприянов маннык быһаарда:

- Спартакиадаҕа үксүгэр эр дьон эрэ күрэхтэһэр. Кэрэ аҥаардарбыт дьиэҕэ бүгэн таах олорботуннар, манна кыттан, кыттыһан бириистээх миэстэҕэ тиксэн бэлэх ыллыннар диэммит бу саҥа көрүҥү киллэрбиппит.

Бу көрүҥҥэ II Дьөппөн иккис хамаандата бастаата. Хачыкаат 1-кы хамаандата иккис, Хачыкаат 2-с хамаандата үһүс миэстэҕэ таҕыстылар.

Хачыкаат нэһилиэгин баһылыга Ирина Оболкина «Дартс» көрүҥэр сыал быраҕа турарын үөрэ көрдүм. Ирина Викторовна улууспутугар сатабыллаах тэрийээччи уонна ситиһиилээх салайааччы быһыытынан биллэр, киниттэн аҕыйах тылы этэригэр көрдөстүм:

- 2005 с. А.В.Киприянов «Ректайм» кэллэктиибин уонна Хачыкаат нэһилиэгин олохтоохторун кытта табаарыстыы көрсүһүүтэ тэрийиэххэ диэн этии киллэрбитэ. Спартакиаданы дьон-сэргэ сэргээбитэ. Сылтан сыл көрүҥэ да, кыттааччыта да элбээн иһэр. Бу 10-с сылыгар илин эҥэр нэһилиэктэр бары иккилии хамаанда туруораннар, нэһилиэнньэ үксэ кытта сылдьар. Нэһилиэкпит туһа диэн атын улууска, куоракка олорор биир дойдулаахтарбыт кытталлар. Бу биһиги олимпиадабыт буолар, - диэн өрө көтөҕүллүүлээхтик эттэ Ирина Викторовна.

Ыһыылаах-хаһыылаах үгүс ыалдьааччылаах көрүҥүнэн өбүгэлэрбит оонньуулара - мас тардыһыыта буолла. Хаҥалас улууһун илин Эҥэр нэһилиэктэригэр киһи мыына көрбөт мадьынылара бааллар эбит. Манна I Дьөппөн, Хачыкаат, II Дьөппөн хамаандалара кыайыылааҕынан буоллулар.

Бу көрүҥҥэ муҥутуур кыайыылаах аатын I Дьөппөнтөн Александр Трофимов иккис төгүлүн ылан 25 тыһ. солк. сыаналаах велосипедынан биһирэннэ.

Волейболга күрэхтэһии икки сааланан ыытылынна. Манна дьахталларга I дьөппөннөр кыайыы өрөгөйүн биллилэр. Хачыкаат, II Дьөппөн хамаандалара бириистээх миэстэлэри ыллылар. Эр дьоҥҥо хачыкааттар иннилэрин кимиэхэ да биэрбэтилэр, үчүгэй бэлэмнээхтэрин көрдөрдүлэр. I Дьөппөн икки хамаандата иккис, үһүс миэстэлэргэ таҕыста.

Хапсаҕайга нэһилиэктэрин туһа диэн Кэбээйиттэн спорт маастара Афанасий Атласов, Ульяновскайтан дойдутугар сынньана сылдьар байыаннай сулууспалаах Олег Артомонов сымса хамсаныылаах тустуулара көрөөччүлэри сэҥээртэ. Оттон спорт маастарын нуорматын 17 сааһыгар толорбут Ньургун Егоров Күөрдэмин туһугар Үөһээ Бүлүүттэн кэлэн кыттан биир дойдулаахтарын үөртэ.

Муҥутуур кыайыылааҕы быһаарар хапсыһыыга эдэр кэскиллээх бөҕөһү Стас Даниловы охторон, I дьөппөннөр күтүөттэрэ, тренеринэн үлэлиир бурят уола, олохтоох «Богомоев» Очир Очиржапов үһүс төгүлүн абсолютнай чемпион аатын ылыан ылла.

Дуобакка алта хамаанда күрэстэстэ. II Дьөппөн бастаата, иккис миэстэҕэ Хачыкаат нэһилиэгин 1-кы хамаандата таҕыста уонна үһүс миэстэни I Дьөппөн 1-кы хамаандата ылла. Манна I Дьөппөнтөн оҕо сылдьан өрөспүүбүлүкэҕэ 64 харахтаах дуобакка чемпионнаабыт, билигин Бэстээххэ үлэлиир Васильев Константины, Хачыкааттан ХИФУ үлэлиир маастарга кандидат Тихонов Романы, II Дьөппөнтөн маастарга кандидат Стручков Станиславы чорботон бэлиэтиэххэ сөп.

Сытыы киирсиилэр мини-футболга буоллулар. Түмүккэ, бастакы миэстэни Хачыкаат 1-кы хамаандата ылла. Иккискэ - II Дьөппөн 2-с хамаандата уонна үһүс бириистээх миэстэҕэ II Дьөппөн 1-кы хамаандата тигистэ. Турнир түмүгүнэн Эдуард Эверстов, Александр Петухов , Георгий Тихонов бастыҥ оонньооччуларынан ааттаннылар.

Остуол тенниһэ эмиэ туһугар олус хатыһыылаахтык барда. Манна Хачыкаат 1-кы хамаандата бастаата. Иккис - II Дьөппөн 1-кы хамаандата, үһүс - II Дьөппөн 2-с хамаандата буоллулар. Биирдиилээн күрэхтэһиигэ II Дьөппөн 1-кы хамаандатыттан өрөспүүбүлүкэ 2-с призера Сергей Леонтьев улахан утарсыыта суох бастаата. Дьокуускай куоракка эрчиллэр Хачыкаат хамаандатыттан Стас Кириллин иккис буолла. Үһүс миэстэни II Дьөппөн хамаандатыттан Валерий Скрябин ылла. Кыргыттарга II Дьөппөн үөрэнээччилэрэ олох үчүгэйдик кытыннылар. Абсолютнайга Настя Егорова бастаата.

Ити курдук, «Ректайм» рекламнай бөлөх бирииһигэр, Самыртай хочотун нэһилиэктэрин үбүлүөйдээх X-с спартакиадата икки күн устата Хаҥалас улууһун илин Энэр нэһилиэктэрин олохтоохторугар спорт, чөл олох, түмсүү уонна сомоҕолоһуу бырааһынньыгынан буолла. Үбүлүөйдээх X-с спартакиада кубогын Ирина Викторовна Оболкина баһылыктаах, Константин Семенович Давыдов капитаннаах Хачыкаат нэһилиэгин хамаандата ылла.