Бу бырайыак сүрүн соругунан үлэтэ суох дьону идэҕэ үөрэтии уонна тыа сиригэр кыра урбааны сайыннарыыга көмөлөһүү буолар, диэн оройуон пресс-сулууспата иһитиннэрэр.

Түөрт күн устата норуоттар икки ардыларынааҕы «Саха-Микрокредит» бизнес-саадын директора Марина Алексеева уонна Норвегияттан сылдьар баһылыыр бизнес-консультант Элин Саббасен тыа нэһилиэгин олохтоохторун урбаан төрүттэригэр үөрэттилэр.

Үөрэнии түмүгэр уон үлэтэ суох гражданнар сертификат туттулар, олортон иккилэрэ Сүлдьүкээргэ олус туһалаах буолуохтаах «Парикмахерскай» уонна «Ателье» диэн темаларга бизнес-былааннары билиһиннэрдилэр. Баттах кырыйтара эбэтэр таҥас тиктэрэ нэһилиэк үгүс олохтоохторо ыраах сытар Светлай бөһүөлэгэр эбэтэр Мииринэй куоракка барарга күһэллэллэр.

Садын нэһилиэгин баһылыга Александра Данилова бырайыак бары кыттыылаахтарын сэрэхэдьийбэккэ урбаан эйгэтин талалларыгар ыҥырда, итиннэ эбии хайысхалары ыйда: общественнай баанньыгы уонна оҕуруот аһын олордууну баһылыырга сүбэлээтэ.

Мииринэй оройуонун дьарыктаах буолууга Киинин бэрэстэбиитэллэрэ үлэтэ суох киһини регистрациялааһын бэрээдэгин, ону таһынан бизнес-былааны оҥорууну ситиһиилээхтик көмүскээтэххэ, субсидияны ылыы усулуобуйатын туһунан кэпсээтилэр.