Бу күннэргэ бурдукка дотация көрүллүбэтин уонна «Якутоптторга» улуус потребобществолара улахан иэскэ (уопсайа 11 мөл. солк.) киирэн олороллорунан, бурдугунан хааччыллыыга тыҥааһыннаах балаһыанньа үөскээбитин Мария Егороваҕа иһитиннэрбиттэр.

Онон чугастааҕы кэмҥэ саҥа үлэлээн эрэр предприниматель бэкээринэтэ моҥкуруут барар суолга үктэммитин СӨ бырабыыталыстыбатын отчуотун кэмигэр кэпсээн, үөскээбит кыһалҕатын быһаарсарга көрдөстө.

Аны тыа сиригэр хамнас кыратыттан, эбиитин кэмигэр кэлэн быстыбатыттан, үгүс дьон килиэптэрин суруттаран ылаллар. Уу харчы суох буолан, билигин предприниматель быйылгы бурдугун атыылаһар кыаҕа суох. Оччотугар собус-соҕотох бэкээринэлэрэ сабыллар туруктаах.

Вице-премьер Петр Алексеев иһитиннэрбитинэн, бу сылга улууска 958 тонна бурдугу «Якутоптторг» уу суолунан уонна сороҕун массыынанан аҕалыахтаах. Биир киилэ бурдук 24 солк. 7 харчынан быһыллыбыт. Онон мантан үрдүө суохтаах. Дотация харчыта улуус киинигэр итиэннэ Бүлүүчээҥҥэ уонна Туойдаахха диэри тиэрдиигэ эрэ көрүллэр. Мантан атын нэһилиэктэр тэрилтэ базатыттан бэйэлэрэ киирэн ылыахтаахтар. Бу түмүгэр килиэп харчыта үрдүөн сөп. Дьиҥэр, бу түгэҥҥэ нэһилиэк баһылыктара күүс-көмө буолуохтарын сөбө.

Онтон Куокуну бэкээринэтин кыһалҕатын вице-премьер бэйэтэ быһаарсыах буолла.