Улахан Ааҥҥа федеративнай сыһыаннаһыыларга уонна тас дойдулары кытта сибээскэ министр Владимир Васильев салайар бөлөҕө сырытта. Олохтоохтор политика туһунан ыйыталастылар. Украинаны кытта сыһыан, санкция туһунан санааларын эттилэр. Ол эрэн, олохтоохтору Павловскайга хим-собуоту тутуу ордук долгутарын биллэрдилэр. Маныаха министр Васильев собуот тутуута билиҥҥитэ быһаарылла илигин, биллэн турар, экологическэй экпсертиза уонна дьон-сэргэ санаатын учуоттаан баран Правительство быһаарыныы ылыныаҕын туһунан этэн дьону уоскутта.

Улахан-ааннар биир көрдөһөр көрдөһүүлэринэн оҕо саадын саҥа дьиэтин тутуу буолар. Билигин уһуйааны 1939 сыллааҕы тутууга үлэлии турар. “Сылын ахсын өрөмүөннүүбүт. Саад үлэһиттэрэ дьиэлэрин олус үчүгэйдик оҥостоннор, хамыыһыйа кэлэн, сэнэх диэн барар. Ол эрээри, бириэмэ ылар – дьиэ олус эргэрдэ”, -- диэтэ баһылык Александр Максимов.

“Бөртө” сылгы собуотун салайааччы Александр Павлов бэйэтин санаатын үллэһиннэ: “Саҥа дьыл иннигэр кредит ылаары сүүрбүппүт даҕаны, аккаастаабыттара. Билигин 30 бырыһыаннаах ыстаапкаҕа биэрэ сатыыллар. Ол биллэн турар биһиэхэ барыыс аҕалбат. Атахпытыгар турарбытыгар ылбыт кредиппитин тыа хаһаайыстыбатын уонна ас-үөл бородууксуйатын министерствотын көмөтүнэн сабыахтаах этибит да, эмиэ үбү ситэри биэрбэккэлэр, кыбаарталга мөлүйүөн кэриҥин төлүү олоробут. Дьэ буоллун, хайдах эрэ үлэбитин сайыннарыахпыт. Ол эрээри, Саҥа дьыл кэннэ сыана эмискэ үрдээн эмиэ кыһалҕаҕа тэптэ. Сэлээркэ, сиэмэ бурдук, комбикорм сыаналара 30-40 бырыһыан үрдээтилэр. Онон олохтоох оҥорон таһаарааччылары өйүүр республика программата наада дии саныыбын”.

“Бөртө” хаһаайыстыбаҕа 549 сүөһү, ол иһигэр 245 ыанар ынах, 1030 сылгы баар. Улууска уонна куоракка бэйэлэрин бородууксуйаларын -- сүөгэйи, арыыны, иэдьэгэйи, кымыһы уонна 20 тахса араас эт аһылыгы - атыылыыллар.