Пенсионер Адамовтар аныгы матырыйаалтан таҥыллыбыт ититэр тиһиктэрин киэн тутта көрдөрөллөр. Ыал аҕа баһылыга Дмитрий Гаврильевич үөрүүтүн үллэстэр: «Сылааһы киллэрии иһин биһиги биир да кэппиэйкэни төлөөбөтүбүт. Ититэр тиһиги тардыыга субсидия биэрбиттэрэ, онон нэһилиэк дьаһалтатыгар, социальнай көмүскэл управлениетыгар махталбыт муҥура суох».

Элбэх оҕолоох Тихоновтар быйыл саҥа дьиэлэригэр малааһыннаабыттара. «Кииннэммит ититэр тиһиккэ холбонорбутун билэр буолан, оһох туруорбатахпыт, - диир Гаврил Тихонов. - Дьиэбитин толору хааччыллыылаах оҥорор санаалаахпыт, кыралаан матырыйаал атыылаһабыт. Соторутааҕыта уу сылытары уонна ваннайы оҥордум. Халлаан сылыйдар эрэ, септикпэр ылсыам».

Бу күннэргэ сэлиэнньэ олохтоохторо сылаас иһин бастакы төлөбүрдэрин оҥордулар. «Ыйга икки тыһыынча курдук тахсар, - диир пенсионер Гаврил Артемьев, - Оннук улахан суума буолбатах. Быйыл оттор мас атыыласпатаҕым, ол эрээри оһохпун көтүрбэтэҕим. Онуоха-маныаха диэри туран эрдин. Тымныынан үргүйбэтин диэн, нэдиэлэҕэ биирдэ оттобун. Аны саас көрүөхпүт, баҕар оһохпун көтүрүөм».

Билиҥҥитэ өссө алта дьиэ кииннэммит ититэр тиһиккэ холбоно илик. Эһиил олор тиэргэннэригэр турба тардыллыаҕа. «Бу үлэни улуус, нэһилиэк уонна ОдьУо КХ ГУП кыттыһан оҥордулар. Нэһилиэк алта мөлүйүөн солкуобайы көрбүтэ, - диэн кэпсиир Хачыкаат нэһилиэгин баһылыга Ирина Оболкина. - Онон ититэр тиһиги тардыыга улаханнык ороскуотурдубут. Ол эрээри дьон олоҕун уйгутун тупсарыыга харчыны харыстаабаппыт. Эһиил дьиэлэри толору хааччыллыылаах оҥорорго бюджеппытыгар 200 тыыһынча солкуобайы көрөргө былаанныыбыт».

Улуус алта нэһилиэнньэлээх пуунугар ититэр тиһиги тардыыга үс бюджеттан 15 мөлүйүөнтэн тахса үп көрүллүбүтэ. Дьиэ иһинээҕи тиһиги таҥыыга социальнай управление нөҥүө 52 ыал субсидия ылбыт. «Биһиги көрдөһүүбүтүн быһа гыммакка субсидияҕа эбии үп көрбүт Үлэ министерствотыгар махталбыт улахан, - диир социальнай көмүскэл управлениетын начальнига Наталья Борисова. - Субсидия уопсай суумата 4 мөлүйүөн 600 тыһыынча сокуобайга тэҥнэстэ».