«Южный хлеб» ХЭТ правлениетын бэрэссэдээтэлэ Анна Тимофеева этэринэн, ыраах нэһилиэктэргэ бурдугу тиэрдии боппуруоһа сыл аайы сытыытык турар. Бу ырыынак коньюктурата  балайда ураты,онон  улуус администрациятын көмөтүнэн эрэ бурдугу тиэрдиини иэс илдьэргэ кэпсэппиттэрэ. «Южный хлеб» ХЭТ үбүн сыллааҕы эргиирэ 3 мөлүйүөн 776 тыһыынча солкуобай, оттон общество ороскуота 4 мөлүйүөн 293 тыһыынча. Ити субсидия төлөнөрүн уонна нэһилиэктэр бэкээринэҕэ мас тиэйэн көмөлөһөллөрүн таһынан.

«Биһиги алтынньыттан бэкээринэлэри урбаанньыктарга куортамҥа биэрбиппит, -  диэн иһитиннэрдэ Надежда Сосина, «Хаҥалас» УПС сэбиэтин бэрэссэдээтэлэ. - Бурдукпут хасааһын кинилэргэ хаалларбыппыт. Ол эрээри саҥаттан ыларга харчы суох.  «Якутоптторг» ааспыт сыллааҕы иэстэри төлүүргэ уонна билиҥҥи тиэйии 30%-нын эрдэ киллэрэргэ модьуйар».
4-с  Малдьаҕар нэһилиэгин баһылыга Прокопий Латышев нэһилиэккэ номнуо сарсын килиэп суох буолуоҕун эттэ. Предприниматель бэкээринэҕэ үлэлииртэн аккаастаммыт. Нэһилиэк килиэп астааччылары маһынан хааччыйарга бэлэм уонна өссө бюджекка урбаанньыктарга анаан 100 тыһыынча солк  уурбут. Ол эрээри нэһилиэккэ билигин килиэп астыан баҕалаах көстүбэт.

«Биһиги күҥҥэ 60-70 килиэби таһаарабыт, - диэн кэпсиир Иһит  урбаанньыга Екатерина Лотова, - бастакы кэмҥэ бурдукка уонна дьиэ куортамыгар төлөһөр олус ыарахан этэ. Кэнники биһиги бытархай бородуукталары – булочкалары, пирогтары астаан саҕалаабыппыт – уонна, арыый ол харчы каһалҕатын арыый чэпчэттэ. Билигин, бурдук кыһалҕатын быһаарар уолдьаста, хасааһым олунньу эрэ ыйга тиийэр хаалла».

Василий Афанасьев, улуус баһылыгын бастакы солбуйааччыта бэлиэтээбитинэн,  администрация экономическэй сулууспата соҕуруу баар бэкээринэлэри саҥа оборудованиенан хааччыйыы боппуруоһун быһаара сылдьар. Ол эрээри, итин кэнники дьыала, оттон дэриэбинэҕэ килиэп билигин наада. Иһит, Сиинэ, Кытыл-Дьура, Үөдэй уонна Тиит-Арыы предпринимателлэрин бастакы кэмҥэ бурдугунан атын да аҕалааччылар хааччыйыахтарын сөп.

Түмүккэ улуус баһылыга Юрий Зайцев бурдугунан ИП Гребнев хааччыйарыгар,  предпринимателлэр «Якутоптторы» кытта салгыы үлэлэһэллэригэр, сылга бурдугу аҕалыыны кэпсэтэллэригэр, модульнай бэкээринэлэри атыылаһан, кэлин нэһилиэккэ биэриини дьаһайарга сорудахтаата.