- Ыҥырыылаах ыалдьыттар бастаан Алтан орто оскуолатыгар (дириэктэр Евгения Филиппова) сырыттылар. Суруйааччылар үөрэнээччилэргэ айар үлэлэрин туһунан кэпсээтилэр, оҕолор хоһоон ааҕалларын иһиттилэр, ыйытыыларыгар хоруйдаатылар, кинигэлэрин илии баттаан бэлэхтээтилэр. Оскуоланы кэрийэн көрдүлэр, оҕолор үлэлэрин быыстапкаларыгар сырыттылар.
- Салгыы бырааһынньыктыы киэргэтиллибит спорт саалатыгар Алтан олохтоохторун кытта атах тэпсэн олорон сэһэргэстилэр, саҥа хоһооннорун аахтылар.
- Нэһилиэк баһылыга Николай Тимофеев кинилэр ыҥырыыларын ылынан Дьокуускайтан кэлбит Россия Суруйааччыларын союһун чилиэннэригэр биллиилээх учуонай Г.В. Попов кыыһыгар Ираида Поповаҕа, биир дойдулаахтара А.Е. Зыкова-Аччыгый Аана уолугар Уйбаан Ойуурга уонна Майаттан кэлбит бочуоттаах бэтэрээҥҥэ, поэкка Василий Сидоровка махталын тиэртэ, айар үлэлэригэр ситиһиини баҕаран туран, нэһилиэк дьаһалтатын Махтал суругун, бэлэхтэри туттарда.
- Библиотекка урукку үлэһитэ Екатерина Матчитова ыалдьыт суруйааччылар айымньыларын кытта билиһиннэрдэ, кинилэр айар дьоҕурдаах оҕолорго үтүө холобур буолалларын бэлиэтээтэ, инникитин да маннык көрсүһүүлэр тиһигин быспакка салҕанан бара туралларыгар баҕарда.
- Оскуола дириэктэрэ Евгения Филиппова суруйааччыларга дойдуларын умнубакка билсэ уонна айымньылаахтык үлэлээн үөрдэ туралларыгар баҕаран туран оскуола аатыттан бэлэх туттартаата. Үөрэнээччилэр уонна нэһилиэк уус-уран самодеятельноһын кыттыылаахтара ыалдьыттарга кэнсиэр көрдөрдүлэр.
- Суруйааччылары кытта көрсүһүү оһуохайынан түмүктэннэ. Оһуохайы тойуксут Иван Олесов таһаарда.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети