"Сардаҥа" кинотеатр фойетыгар "Эҥсиэли хочотун айар талааннаахтара", "Саха литературатын 100 бастыҥ айымньылара" диэн кинигэ быыстапката элбэх киһи болҕомтотун тарта. Олохтоох автордар кэлбит дьоҥҥо бэйэлэрин кинигэлэрин атыылаатылар, бэлэхтээтилэр.

Тэрээһин үөрүүлээх чааһа улуустааҕы гимназия уолаттарын ансаамбыла, улуус эдэр ыччата сааланы тула туран уонна тэрээһин кыттыылаахтара бары аатырбыт "Хайыһары" ньиргиччи ыллааһыннарынан саҕаланна. Ол кэнниттэн Нам начальнай оскуолатын үөрэнээччилэрэ "Чаҕылҕан, Эн хоһоонноруҥ көлүөнэттэн көлүөнэҕэ ааҕылла туруохтара" диэн литературнай композицияны көрдөрдүлэр. Улуус баһылыга Александр Атласов И.Д. Винокуров-Чаҕылҕан 100 сылынан улууска, республикаҕа барбыт тэрээһиннэр тустарынан дакылаат оҥордо.

Александр Павлович улууспут чулуу уолугар, биллиилээх поэт, литератор, тылбаасчыт И.Д. Винокуров-Чаҕылҕан 100 сылыгар анаммыт сыл түмүктэммитин биллэрэн туран бу үтүө киһи аатын үйэтитиигэ сыраларын харыстаабакка үлэлээбит тэрилтэлэргэ, дьоҥҥо улуус дьаһалтатын Бочуотунай грамоталарын, Махтал суруктарын туттарда.

Александр Павлович: "Литература сыла — общество сиэр-майгы өттүнэн тупсуутугар туһаайыллар. Хас биирдиибитигэр киһи буоларбытын толкуйдатар, олох сиэрдээх сыаннастарын чиҥэтэр аналлаах", - диэн туран Нам улууһугар Литература сыла аһыллыбытын биллэрдэ.

Сценаҕа улуус нэһилиэктэрин баһылыктара тахсаннар олохтоох автордар хоһооннорун утуу-субуу ааҕан субуруттулар. Дьокуускайтан кэлбит ыалдьыттар: Сэмэн Попов-Тумат, Николай Винокуров-Урсун, Елена Слепцова-Куорсуннаах тэрээһиҥҥэ мустубут дьону истиҥник эҕэрдэлээтилэр, улуус бар дьонугар үгүс ситиһиилэри баҕардылар. Олохтоохтор ыалдьыттарыгар тыыннаах сибэкки туттардылар. Ол кэнниттэн улууспут суруйааччылара - "Отуу уота" литературнай түмсүү чилиэннэрэ салайааччылара Александр Дунаевы кытта тахсан эҕэрдэ тыл эттилэр.

Тэрээһин литературнай дьүһүйүүнэн, ырыанан, үҥкүүнэн, тойугунан, хомус тардыынан, хоһооннорунан силигэ ситэрилиннэ.

Бу түһүмэххэ З.П. Винокуров аатынан оҕо искусствотын оскуолатын бальнай кылааһын үҥкүүһүттэрэ (салайааччы С. Кудрина), Нам начальнай оскуолатын үөрэнээччилэрэ (А.И. Ядрихинская), улуус гимназиятын үөрэнээччилэрэ, Елена Иванова сольнай ырыанан, "Дьырылыатта" оҕо фольклорнай бөлөҕө (Е. Иванова), Партизан "Хоһоону таптаан ааҕааччылар" түмсүүлэрэ (А. Алексеева), "Мичээр" оҕо үҥкүү народнай, образцовай ансаамбыла, гимназия уолаттарын вокальнай ансаамбыла (Н. Сивцева) кытыннылар.

Тэрээһини иилээн-саҕалаан ыытааччылар: "Литература баар буолан киһи аймах үйэ-саас тухары олоххо кэрэни айарга дьулуһар, олох чахчытын уус-ураннык өркөн өй күүһүнэн, ис дууһа иэйиитинэн ойуулуур. Биһиги ийэ тыл уустара буолар ытык дьоммутугар сүгүрүйэбит, кинилэринэн киэн туттабыт. Төрүт, баай ийэ тылбыт умнуллубатыгар, көмүс бөрүөнэн суруллар сүдү, дьоһун айымньылар үксүү туралларыгар баҕарабыт!" -- диэн эрэли саҕар, ситиһиигэ кынаттыыр этиилэринэн улууспутугар Литература сыла саҕаланыытын үөрүүлээх тэрээһинин түмүктээтилэр.