Тэрээһиҥҥэ коммунальнай тиһик уонна стратегическай сайдыы департаменын салайааччы Виталий Чикачев, «Намкоммунтеплоэнерго» АУо генеральнай директора Николай Игнатьев, «Намкоммунтеплоэнерго»АУо Инвестиционнай программатын бырайыагын салайааччы Сергей Климов,СР «Субсидия агентствотын» ГКУ директора Наталья Сивцева, «РАЭР» СР ГБТ директора Алексей Пахомов, Нам улууһун нэһилиэгин баһылыктара, «СР ОДьКХ” ГУП филиалларын салайааччылара, нэһилиэнньэ кытыннылар.

Бэлиэтээн эттэххэ, Нам улууһугар кэнники үс сылга хочуолунайдары тутууга уонна тупсаран оҥорууга, техническэй модернизацияҕа, коммунальнай өҥөнү сайыннарыыга улахан үлэ ыытылынна.

Билигин Фрунзеҕа урукку үс хочуолунай оннугар биир квартальнай хочуолунай үлэлиир. Манна номнуо 15 олорор дьиэ, 6 социальнай объект холбоннулар.

Бэлиэ түгэн үөрүүлээх чааһа Арбыҥҥа буолла. Мустубут дьоҥҥо, ыалдьыттарга үлэ-хамнас түмүгүн, нэһилиэктэри салгыы сайыннарар былааннарын билиһиннэрдилэр. Дьиэлэри ититиигэ холбооһуҥҥа кыһамньылаахтык үлэлэспиттэри чиэстээтилэр.