Күннэр чэрчилэринэн оройуон сылгыһыттара түмсэн кэпсэттилэр, үлэлэригэр көрсөр кыһалҕаларын дьүүллэстилэр. Манна тыа хаһаайыстыбатын оройуоннааҕы управлениетын начальнига Карл Слепцов сүрүн дакылааты оҥордо, сылгы иитиитин тупсарыыга кэккэ этиилэрин иһитиннэрдэ. Ветеринарнай управление начальнига Матрена Терехова сылгы иитиитигэр тахсар сүтүктэри ырытта, сорох хаһаайыстыбаларга сылгыны ааҕыы үчүгэйдик ыытыллыбатын, онон сылгы ахсаана чуолкайа суоҕун бэлиэтээтэ.

Нэһилиэктэртэн кэлбит сылгыһыттар сылгы хаанын тупсарар сыалтан ыаллыы сытар улуустартан атыырдары атыылаһан нэһилиэктэринэн тарҕатары туруорустулар. Онуоха Муома оройуонун айылҕатыгар сөп түбэһэр Дьааҥы, Усуйаана, Өймөкөөн оройуоннара ааттаннылар. Муома оройуонун баһылыга Петр Черемкин бастыҥ сылгыһыттарга бочуотунай грамоталары туттарда.

Муус устар 4 күнүгэр Суон Тииттиир Кэрэхтээх күөлүгэр ат сүүрдүүтэ буолла. Манна 800 м, 1200 м, 1600 м уонна 2400 м дистанцияларга Хонуу, Улахан Чыыстай, Индигир, Соболоох нэһилиэктэрин сылгылара илин-кэлин түһүстүлэр.

Түөрт дистанцияҕа сүүрдүү түмүгэр Индигир нэһилиэгин сүүрдээччилэрэ бастыҥнарынан ааттаннылар. Александр Атласов уһун дистанцияларга – 1600 м уонна 2400 м бастаан " Бастыҥ ат сүүрдээччи" ааты сүктэ уонна улуус баһылыга туруорбут "Буранын" хаһаайынынан буолла. Улахан Чыыстай нэһилиэгэ туруорбут убаһатын эмиэ кини ылла. Александр аҕата Александр Атласов баайбыт сылгылара 800 м уонна 1200 м бастаатылар, онон "Бастыҥ ат баайааччы" ааты ылла. Кинилэр ийэлэрэ Атласова Тамара Михайловна "Бастыҥ ат киэргэлэ" күрэс кыайыылааҕынан буолла. Соболоох орто агропрофилированнай оскуолата "Бастыҥ агро-оскуола" аакка тигистэ. Муома оройуонун саамай ыраах нэһилиэгиттэн, Улахан Чыыстайтан, кэлэн кыттыбыт сылгыһыттарга Күннэр тэрийээччилэриттэн туспа махтал этилиннэ. Сылгыһыттар Игнат Наумов, Степан Слепцов, Дьулустаан Алексеев баайбыт сылгылара биэтэккэ иккиһинэн кэлэн үөрдүлэр-көттүлэр.

Ат сүүрдүүтэ бу иннинэ Муомаҕа икки сыл анараа өттүгэр, 2013 сыллаахха, буолбута. Маннык күрэхтэһиилэр сылгы иитиитин сайыннарыыга төһүү күүс буолаллар.