Дьаакып - Бүлүү Кыадаҥдатын төрүт олохтооҕо. Уон саастаах оҕотун соҕотоҕун иитэр аҕа буолан, социальнай контракт өйөбүлүн туһанан, былырыын “Синтай” тыраахтар ылыммыт. Кини оҕуруот аһын үүннэриигэ бэйэ дьыалатын тэриммит - үс сылга 3 га сири арендаҕа ылан, онно хортуоппуй үүннэрэр былааннаах. Биллэн турар, саҥа сири таҥастаан, бааһына оҥостуох диэтэххэ, уустук дьыала. Гааттан тахса сири хорутан, олордубут хортуоппуйа былырыын кураан уонна баһаардаах дьыл буолан, үчүгэйдик үүммэтэх. Ол да буоллар төрөөбүт сирэ эдэр киһи бастакы сорунуутун “сүрэхтээбит” – бааһынатыттан 20-тэн тахса куул хортуоппуйу ылбыт.

“Биэс-алта куулу ватсап көмөтүнэн Бүлүү куоракка батарбытым. “Кыадаҥда хортуоппуйа” Бүлүү эҥэр бренд буолбута ыраатта. Соторутааҕыта өрөспүүбүлүкэбит бастакы президенэ Михаил Николаев Кыадаҥдаҕа кэлэ сырыттаҕына бастакы бородууксуйабын амсаттым, “Олох ураты минньигэс хортуоппуй эбит”, -- диэн хайҕаабытыттан санаам көтөҕүллэн сылдьабын”, -- диэн кэпсиир Яков.

Кыадаҥда эдэр предпринимателэ бэлиэтииринэн, бу эргин ынах уонна сылгы сүөһүнү иитэргэ күчүмэҕэйдэрдээх эбит. Сирэ кыараҕас буолан, мэччирэҥ уонна ходуһа сирэ суоҕун кэриэтэ. Яков дьонун кытта олорор. Оттуур сирдэрэ суох буолан, икки ыанар ынаҕы хаалларан баран, сороҕун эһэргэ күһэллибиттэр. “Уматык сыаната да ыараата. Онон ыраах баран оттуур кыаллыбат. Ол иһин үлэ саҥа хайысхатын тобулабын”, -- диэн этэр Яков Васильев.

“Бэйэ дьыалатын тэринэргэр туох ыарахаттары көрүстүҥ?”, -- диэн ыйыппыппар, эдэр киһи: “Суох, судургу эбит. Ол, арааһа, өйөбүл күүһүттэн буолуо. Тустаах докумуону оҥорорбор көмөлөспүттэрэ. Онтон “оонньообутум” кэнниттэн 150 тыһ. солк. өйөбүл харчыны тута биэрбиттэригэр , көлө ылыммытым”, -- диир Яков. “Оонньооһун” диэн бизнес-былааны көмүскээһинин этэр эбит. Тустаахха, кырдьык, лотереяҕа оонньооһун кэриэтэ буоллаҕа дии.

Ити курдук, Кыадаҥда эдэр предпринимателэ бэйэтин дьыалатын аһан, аҕыйах кэм иһигэр атаҕар бигэтик туран, өссө да саҥаттан саҥа сүүрээни олоххо киллэрэр былааннаах. Яков Васильевы кытта кэпсэтэн баран, сотору кэминэн аны куорат олохтоохторо: “Кыадаҥда хортуоппуйун ыытыҥ”, -- диэн билэр дьоммутугар сакаастаһар буолууһубут диэн санааҕа кэллим.