Предприниматель мас таҥастыыр сыаҕар киирээт, аныгы технологиянан үлэлиир станогу көрөн соһуйдубут. Бу Алберт Васильев кредит ылан Санкт-Петербургтан атыыласпыт аныгы технологиянан үлэлиир маһы тыырар шведскэй тэрилэ. Мас көөбүлэ тута муос шланганан бородууһунанан үрдэриллэ турар. Оттон таҥастаммыт мас эмиэ бэйэ оҥорбут кыракый түннүгүнэн таһырдьа курдары ааһа турар. Аныгы үйэ тэрилэ диэх курдук, ханан да быыл, бөх-сыыс суох.

- Маспытын пилорамаҕа эрбэтэн баран, манна "глубокай переработка" диэн ньыманы туттабыт. Ол аата эрбэммит маһы анал камераҕа куурдабыт. Технологията -- инфрокраснай сардаҥа. Маһы куурдар анал камераны бэйэм толкуйдаан оҥорбутум. Манна 15 куб. маһы холкутук биирдэ куурдан таһаарыахха сөп. Иһэ-таһа "герметичнэй" буолан, сылытара да түргэн, сылааһы да өр тутар, тиэрмэс курдук. Манна 5 кВт эрэ холбонон турар. Дьиҥэр 10-15 кВт туруордахха, үс күнүнэн куурдуохха сөп. Быйыл 300 куб. маһы таҥастыахтаахпыт", - диэн кэпсиир Альберт Васильев.

Нэһилиэк предпринимателэ бэйэтэ дэлээнэлээх. "Таҥастаабыт маспытыттан туох да хаалбат, төрдүн-төбөтүн барытын туһанабыт. Үгэс курдук пилорамаҕа тиийдэххэ, бөх-сыыс бөҕө буолар дии. Биһиги тутуннубут да, тута кыраабылынан хомуйан иһэбит", -- диир Альберт. Эдэр киһи Антоновкаҕа олорон, Дьаархаҥҥа баар пилораматыгар киирэ-тахса сылдьар.

"Сүрүннээн Ньурбаны хааччыйабыт. Биһигини кытта күрэстэһэр маһы таҥастыыр киһи суох, онон улууска миигин билэр буоллулар", -- диэн кэпсиир предприниматель.

Ньурбаҕа сылдьан көрдөххө, кэтэх дьиэни тутуу далааһыннанан эрэр. Онон Альберт Васильев кэскиллээх суолу тутуһан, дьоҕус бизнеһэ улахан производствоҕа тиийэ сайдар кыахтаах. Тыа сирин сайдыыта кини курдук предпринимателлэртэн тутулуктааҕа чахчы.