Бары билэрбит курдук, былырыыҥҥы ойуур баһаара Чагда, Арыктаах, Мастаах, Сайылык нэһилиэктэринэн Бүлүүгэ ааспыта. Ол түмүгэр ирбэт тоҥ бүрүөһүнэ алдьанан, былырыын күһүн сир-дойду бадараан буолбута. Кырдьаҕастар кэпсииллэринэн, 1947 сыллааҕы улахан баһаар Бүлүү өттүттэн илин ааспыт, ол саҕана баһаары да умуруора сатыыр киһи аҕыйаҕа, өтөхтөр эрэ орпуттар.

Бу баһаардар күллэрэ, кирэ-хаҕа быйыл саас Эбэбитигэр киириэхтээх, ол балыкка хайдах дьайыаҕа өссө биллибэт. Мунньахха бу буортулаах дьайыыны хайдах аччатабыт диэн боппуруос тула кэпсэтии барда.

Улуу Эбэҕэ 2 улахан, 12 орто үрэх уонна элбэх от үрэхтэр сүүрүгүрдэллэр, оттон тахсар үрэх биир эрэ. Бу үрэхтэр Горнай улууһун быыһыттан ууну кытта сыыһы-буору, баһаар күлүн аҕалыахтара. Мунньах кыттыылаахтара бу кир-хах буортутун аччатар туһугар туох көмө наадатын, бэйэлэрин этиилэрин суруйан Айылҕа харыстабылын министиэристибэтин Ытык сирдэри харыстыыр отделыгар (салайааччы С.И. Терехов) ыытарга быһаардылар. Баһаар тобоҕо киирэр үрэхтэр тамахтарын, саатар аҕыйах үрэҕи, кыра харахтаах тимир сетканан бүөлүөххэ, онно иннигэр өссө дель тутан отун-маһын дьуһуурунайдаан ыраастыы сатыахха диэн эттилэр. Оттон Сиэн үрэҕи, күөлтэн тахсар үрэҕи, төрдүнэн эрдэ ыраастаан бэлэмниэххэ наада. Маны айылҕа харыстабылын министиэристибэтиттэн исписэлиистэри аҕалан көрдөрөн, түмүк быһаарыылары оҥорор эмиэ наада.

Уопсай мунньах быһаарыытын ылан айылҕа харыстабылын үлэһитэ Василий Афанасьевич Эверстов министиэристибэҕэ баран быһаарсыаҕа, туох быһаарыы ылыллыбытынан үлэлэһиэҕэ.

Бу барыта суол хаала илигинэ оҥоһуллуохтаах, кыһыҥҥы суол сабыллан эрэр, сайын биһиэхэ сэтинньигэ диэри суол суох.