Ол курдук, спорт 11 көрүҥэр: волейболга, хабылыкка, хаамыскаҕа, остуол тенниһигэр, саанан ытыыга, дуобакка, саахымакка, хайыһарынан сүүрүүгэ, хайыһар эстафетатыгар, сүүрүүгэ, бильярдка нэһилиэктэрин, улуус киинин уонна ыаллыы сытар Аллараа Халыма хамаандалара кыттан, күрэхтэһии зональнай статуһу сүктэ. Дьиҥэр, хара маҥнайгыттан Халыма-Индигир зонатын күрэхтэһиитэ диэн былааннаммыта, ол эрээри суол-иис күчүмэҕэйдэриттэн атын улуустар кыайан кэлбэтилэр.

Тэрээһиҥҥэ Бэтэрээннэр республикатааҕы сэбиэттэрин президиумуну чилиэнэ Василий Николаевич Васильев, СР Спордун министиэристибэтин идэлэх сойууһун бэрэссэдээтэлэ Гаврил Гаврилович Сивцев, Ил Түмэн депутата, ДьТХА декана Леонид Николаевич Владимиров, Ил Түмэн депутата, „ОДьКХ“ ГУП генеральнай дириэктэрин солбуйааччы Юрий Николаевич Садовников ыалдьыттаатылар. Күрэхтэһии кылаабынай судьуйатынан Сиэн Күөл нэһилиэгиттэн төрүттээх, республикатааҕы спортивнай-чэбдигирдэр отдел салайааччыта, Баһылай Манчаары аатынан спорт национальнай көрүҥнэригэр киин сүрүн специалиһа Сергей Алексеевич Бандеров кэлэн үлэлээтэ, биир дойдулаахтарын өйөөтө.

Илин-кэлин түсүһүүлээх күрэхтэһии 5 күн устата барда. Түмүккэ бастакы миэстэни олохтоох Сиэн Күөл нэһилиэгин хамаандата ылла, иккис миэстэҕэ Орто Халыма куорат I-кы хамаандата, оттон үһүс бочуоттаах миэстэҕэ Иккис Мээтис нэһилиэгин бэтэрээннэрэ таҕыстылар. Уопсай сүбэнэн эһиилги спартакиада үһүс миэстэни ылбыт хамаанда сиригэр-уотугар, Сыбаатай бөһүөлэгэр ыытыллыа диэн быһаардылар.

Бэтэрэннэр сыллааҕы түмсүүлэригэр аҥардас спордунан эрэ муҥурдаммакка, эдэр саастарын санаан хайаан даҕаны култуурунай тэрээһиннэри ыыталлар. Быйылгы көрсүһүү Улуу Кыайыы 70 сылыгар ананна. Ол курдук, „Вальс Победы“ уонна „Хор Победы“ куонкурустар ыытылыннылар.

Маны таһынан прикладной искусство быыстапката тэрилиннэ. Манна улуус бары муннуктарыттан дьоҕурдаах, талба талааннаах дьон оҥоһуктара киэҥ дьүүлгэ туруорулунна.

Тэрээһин биир ураты суолталаах түгэнинэн Улуу Кыайыы 50 сылыгар туруоруллубут „Олох салҕанар“ монумеҥҥа венок ууруута буолла. Манан бэтэрээннэр кэнчээри ыччакка дойдуга таптал, ааспыт историяҕа харыстабыллаах сыһыан холобурун көрдөрдүлэр. Түмүккэ Улуу Кыайыы 70 сылыгар анаан 70 фанаары күөх халлааҥҥа көтүттүлэр.

Бары тэрээһиннэр түмүктэринэн улуус аҕа саастаахтара республика бары олохтоохторугар ыҥырыы таһаардылар. Ол курдук, чөл олоҕу пропагандалааһыҥҥа, арыгылааһыны, наркоманияны, табахтааһыны утарар үлэникүүһүрдэргэ эттилэр. Улуус таһымыгар нарколог бырааска толору ставканы олохтууру, депутаттарга уонна МТ дьаһалталара чөл олох кииннэрин тэрийэллэрин туруорустулар. Ону тэҥэ улуус дьаһалтатыгар „Школа третьего возраста“ тэриллэригэрүлэлэһэргэ сүбэлэннэ.

Онон саастаахпын диэн саараабакка, кырдьаҕаспын диэн кыһарыйтарбакка, олоххо өссө да көхтөөх позициялаах биһиги ийэлэрбит-аҕаларбыт, эһэлэрбит-эбэлэрбит бэйэлэрин холобурдарынан кэнчээри ыччаты чөл олоххо, өй-санаа өттүнэн баай буоларга ыҥыраллар.