Үлэҕэ эриллибит, сырыы бөҕөнү сылдьыбыт табаһыт уолаттар ыалдьыттары үөрэ-көтө көрсөн, табаҕа хатааһылатан, сууманы көрдөрөн, санааларын үллэстэн, сүрдээҕин астынан хааллылар.

«Опора» родовой община табаһыттара «Эдек» Сынньалаҥ киин бары үлэһиттэригэр, Майыар учаастактааҕы балыыһатын бырааһыгар Баира Николаевнаҕа, «Буранынан» илдьэ сылдьыбыт Гаврил Васильевич Никулиҥҥа, Марк Константинович Слепцовка, Ростилав Анатольевич Никоновкамахталларын этэллэр. Ону кытта үп-харчы боппуруостарыгар куруутун көмөлөһөр, ис дууһатыттан табаһыттарга ыалдьар Людмила Егоровна Жирковаҕа община үлэһиттэрэ махталлара муҥура суох.

Эдэр табаһыттар Алексей Черов, Николай Рязанскай, Анатолий Захаров таба иитиитигэр бэриниилээхтэрэ, дьаныардаахтара сөхтөрдө. Эбээн норуотун төрүт дьарыгын сөбүлүүр буолан, тыа ыарахан усулуобуйатын аахсыбакка үлэлии-хамсыы сылдьалларын көрөн итэҕэйдибит. Биригэдьиирдэрэ Мария Константиновна уолаттары ийэлэрин курдук көрөр-истэр, бүөбэйдэһэр.

Тыа хаһаайыстыбатыгар өр сылларга үлэлээбит Людмила Жирковаҕа табаһыттар махталларын истэн, кини туһугар ис дууһабыттан үөрдүм. Киниттэн бу сылга туох хамсааһын, уларыйыы баарын ыйыталастым.

- Тохсунньу 1 күнүттэн табаһыттар хамнастара 20 тыһыынча солк. буолбута.Бүгүҥҥү күннээҕи туругунан, табаһыттар ааспыт ыйдааҕы хамнастарын барытын ыллылар. Аны күһүҥҥэ дылы бородукталарынан хааччылыннылар.

Улуус дьаһалтата табаны атыылаһарга 1 мөл. 125 тыһ. 882 солк. көрөн, 100 табаны Усуйаанаттан аҕалбыппыт. Айан ороскуотун эмиэ дьаһалта 500 тыһ. солк. төлөөбүтэ.

Табаһыттар улуус дьаһалтата өйөбүлүн астынан бэлиэтииллэр. Ааспыт сылтан санаалара көтөҕүллэн, үлэлиир баҕалаахтар, аны күһүн таба ахсаанын 1000-ҕа тиэрдэргэ соруктаналлар. Стандарка эппиэттиир табаланнахпытына дьэ абыраныа этилэр - 13 табаһыт бюджеттан хамнастанарбуолар. Билигин 4 эрэ табаһыт хамнас аахсар. Аны туттар мал-сал, атын да ороскуоттарыгар үп көрүллүө.

Уопсайынан, табаһыттарга болҕомто ууруллубута хайҕаллаах. Усуйаанаҕа баран, уопут атастаһан кэлбиттэрэ улахан төһүү буолла. Аны биир табаһыппыт - Анатолий Захаров бырайыаһа, сынньанар-эмтэнэр путевката төлөнөн, Дьокуускайга баран эмтэннэ.

Табаһыттар билиҥҥитэ 60-ча тугуту ыллылар.