Нэһилиэктэрин, улуустарын чиэһин көмүскүүр кыттааччыларбыт бары даҕаны бэртээхэй артыыс дьон буолан биэрдилэр. Күрэспит түһүмэхтэрэ уустук соҕус этэ да, хата, биһиги дьоммут онтон иҥнэн-толлон туруохтара дуо? Бииртэн биир бастыҥ талаан сценаҕа тахсан ырыаларын, тойуктарын уу сүүрүгүнүү доллоһуттулар.

Бастакы түһүмэх «Өбүгэм үтүө үгэстэрэ» фольклор көрүҥнэринэн саҕаланна. Манна Нам улууһун Хатыҥ Арыы нэһилиэгиттэн кыттыбыт Ньургуйаана Адамова «Айылгы» композицияны толорон бастыҥ ааты ылла.

Иккис түһүмэх - «Төрөөбүт дойдум» уус-уран ааҕыы. Кыттааччыларбыт уус-уран ааҕыыны бары үрдүк таһымнаахтык толордулар.

Үһүс түһүмэххэ «Таптыыр идэм» диэн култуура эйгэтигэр талан ылбыт идэни арыйар уус-уран толорууга «Айар куттаах кыттааччы» үрдүк ааты Хаҥалас улууһуттан сылдьар Николай Никитин бэйэтэ айбыт таҥастарын көрдөрөн биир биэс тыла суох биэтэккэ таҕыста.

Төрдүс, талба талааннаахтар түһүмэхтэрэ тапталы талбыт көрүҥҥэ дьүһүйүүгэ Елена Руфова (Ι Хомустаах, Нам улууһа) Варя Ларионова-Ый Кыыһа «Кыысчааммар» ырыатын толорон «Дьолум төрдө тапталым» анал ааты ылла.

Бэһис, киэһээҥи таҥас түһүмэҕэр кыттааччыларбыт оҥостон, таҥнан-симэнэн кэлбиттэрэ тутатына харахха быраҕыллар. Бүтэһик, «Алаһа дьиэм – дьоллоох уйам» диэн алтыс түһүмэххэ Ньургуйаана Адамова инники күөҥҥэ таҕыста. Маны таһынан бастыҥ ырыаһыкка Ксения Неустроеваҕа «Ылбаҕай ырыаһыт», Елена Руфоваҕа «Минньигэстэй асчыт», Николай Никитиҥҥэ «Кыайыыга дьулуурун иһин» анал ааттар туттарылынна, Саха Өрөспүүбүлүкэтин идэлээх профсоюһун анал бирииһэ Екатерина Рыкунаваҕа ананна. «Талба талаан - 2014» үрдүк ааты Ксения Неустроева (Абаҕа, Амма улууһа) сүктэ.

Ити курдук уустук тургутууну ааһан кэрэни кэрэхсиир, үтүөнү үксэтэр култуурабыт үлэһиттэрэ бэйэлэригэр биир кэрэ киэһээни анаатахтара.
Түгэнинэн туһанан, Култуура сыла түмүктэнээри турдаҕына култуура, ускуустуба сайдарын туһугар үтүө суобастаахтык, бэриниилээхтик, киэҥ хоннохтоохтук, кэтит кэскиллээхтик үлэлии-хамсыы сылдьар дьоммутугар, өр сыллар устата култуура эриирдээх-мускуурдах үлэтигэр эриллэн-мускуллан, талааннарын дьоҥҥо-сэргэҕэ анаабыттарын иһин барҕа махтал тылларын этэбит!