А.Саввина талан ылбыт идэтигэр бэриниилээх киһи. Культураҕа уопсайа 34 сыл, онтон Арыылаахха 24 сыл устата үлэлээтэ. Кинини кытта бииргэ үлэлээбит 6 культура специалиһа үүнэн тахсыбытынан киэн туттар. Онтон хаан аймахтарыттан биэс киһи культура эйгэтигэр күн бүгүн үлэлии-хамсыы сылдьаллар. Ол курдук бииргэ төрөөбүт балта хореограф Горохова М.А. Кэптэнигэ Саха-Бельгийскэй гимназияҕа эбии үөрэхтээһин педагога, кини кыыһа Елизавета ХИФУ культорология факультетын студентката, үчүгэй үҥкүүһүт. Мария Афанасьевна “Айыллаана” үҥкүү ансамблын 2000 сыллаахха тэрийбитэ.

“Айыллааналар” улуус, республика, Россия таһымнаах конкурстарга ситиһиилээхтик кытталлар. 2012 с. “Под небом Парижа” диэн этнофестивальга Францияҕа тиийэн II степеннээх дипломунан бэлиэтэммиттэрэ. Мария Горохова “Лөгөй сирэ үҥкүүлүүр” бырайыак автора. А.Саввина быраата А.А.Колесов режиссер үөрэхтээх, эдэр эрдэҕинэ Тулуна кулуубугар ситиһиилээхтик үлэлээбитэ. Билигин юрист идэлээх, улуус мунньаҕын депутата. Сиэн балта Людмила Лугинова Баатаҕайга этнокультурнай киин уус-уран салайааччыта. Икки сиэн балыстара Антонина, Мария Лугиновалар АГИИК-ка үөрэнэллэр.

Антонина Бэйдиҥэ кулуубун методиһа. Александра Афанасьевна дьэ бу балыстарыгар уонна бэйэтэ салайар үҥкүүһүттэригэр тирэҕирэн арыылаахтарга бэртээхэй концеры бэлэхтээтэ. Ол курдук бу киэһэ Кэптэниттэн “Айыллаана” үҥкүү бөлөҕө, Бэйдиҥэттэн “Эр модун” үҥкүү бөлөҕө, Иван Румянцев, А.Лугинова уонна кини салайар “Утум” фольклорнай бөлөҕүн хомусчуттара, олоҥхоһуттара; Сыырдаахтан Александр Иванов, Баатаҕайтан эдьиийдэрэ Елизавета Сивцева оҕолорунаан, сиэннэринээн; Дьокуускайтан А.Колесов, М.Лугинова, Арыылаахтан М.Говорова, Л.Габышева, үҥкүүһүт оҕолор кыттыылаах киэҥ ис хоһоонноох концеры “Эйгэ” сынньалаҥ киин дьоҕус гынан баран ыраас, сылаас, ис киирбэх оҥоһуулаах дьиэтигэр дуоһуйа көрдүбүт. Өлтөх нэһилиэгин баһылыга Сивцев Н.Н. кэлэн эҕэрдэтин тиэртэ. Культура сыла диэн бу аҥардас ырыа, үҥкүү эрэ буолбакка, бары эйгэни хабар киэҥ өйдөбүллээҕин санатта. Нэһилиэккэ культура сылын кулун тутар 7 күнүгэр үөрүүлээхтик аһаары олороллорун иһитиннэрдэ.

Манна даҕатан эттэххэ, А.Саввина салайар ааспыт сыл арыйыыта буолбут, Майаҕа Олонхо ыһыаҕар “Сүр көтөҕүүтэ” үҥкүүһүт эр дьон күрэҕин кыайыылаахтара “Эр модуннар”, Антонина Лугинова, Лада Габышева уонна Александра Саввина ыам ыйыгар Польшаҕа “Летние напевы страны олонхо” диэн Саха сирин кытта сибээстээх поляктар ыытар фестивалларыгар бараары тэринэ сылдьаллар.

Спорду, культураны өрө туппут Арыылаахха муус устарга библиотекарь, СР культуратын туйгуна И.Н.Гоголева дьиэ кэргэнэ, ыһыахха кэмигэр кулууп директора, СР культуратын туйгуна Е.Е.Карамзина аймахтара, сэтинньигэ СР культуратын туйгуннара эдьиийдии-балыстыы М.Н.Герасимова уонна Е.Н.Данилова аймахтарын айар киэһэлэрэ былааннанар. Бу курдук аймаҕынан, көлүөнэнэн айар күннэри, киэһэлэри тэрийии дьон-сэргэ сэҥээриитин ылара, культура тэрилтэлэригэр болҕомтону тардара саарбаҕа суох.