Үгэс быһыытынан бэлиэ тэрээһин уот иччитин аһатыыттан, алгыһы этииттэн саҕаланна. Кэлбит ыалдьыттары П.А.Ойуунускай аатынан музей салайааччыта  Раиса Аммосова эҕэрдэ тылынан көрүстэ.

Ыалдьыттар балаҕаннарга тарҕастылар. Онно революция иннинээҕи саха дьонун олоҕо бу баардыы итэҕэтиилээхтик ойууланан көһүннэ. Саха академическай театрын артыыстара Амма Аччыгыйа “Сааскы кэм” романыттан быһа тардан оонньоотулар.

Мемориальнай музей-дьиэҕэ 1935-1938 П.Ойуунускай олорбута. Кабинетыгар Ойуунускай олохоһуту истэр, бэлиэтэнэр. Куукунаҕа ыччат чэй иһэр, А. Софронов-Алампа айымньытын ырытар, оҕолор хосторугар Ойуунускай кыыһа диктант суруйар.

Бу күн «Антракт» саҥа сурунаал сүрэхтэннэ. Саха сирин народнай артыыһа  Ефим Степанов театр олоҕун сырдатар сурунаал тахсыбытынан мустубут дьону эҕэрдэлээтэ.