«Олоҥхо дьиэтэ» этно-култуурунай кииҥҥэ тэрээһин үөрүүлээх аһыллыытыгар бу сырыы сүрүн сыала-соруга, бастатан туран, тыа сирин култууратын эйгэтин тэрилтэлэрин үлэһиттэригэр методическай көмөнү оҥоруу, республика култуураҕа уонна искусствоҕа үөрэҕин кыһалара тыа сирин оҕолоруттан талааннаахтары сүүмэрдээһиннэрэ буоларын бөлөх салайааччыта Михаил Донской бэлиэтээтэ. Салгыы Бүлүү эҥэр улуустар эдэр худуоһунньуктара билиҥҥи олох араас эгэлгэ көстүүлэрин харандааһынан, кыраасканан дьүһүйбүт бэртээхэй быыстапкалара көрдөрүлүннэ.

Дьокуускайтан кэлбит специалистар «Култуура эйгэтигэр менеджмент», «Музей үлэтэ», «Библиотека эйгэтэ», «Музыка – барыбытыгар», «Оҕону искусствоҕа уһуйуу оскуолаларыгар үөрэтии ньымалара» диэн семинардары ыыттылар.

Турне биир кэскиллээх хайысхатынан В.А. Босиков аатынан Музыка үрдүкү оскуолатын, Аксинья уонна Наталья Посельскаялар ааттарынан хореографическай училище уонна художественнай колледж үлэһиттэрэ бэйэлэрин үөрэхтэрин кыһаларыгар талааннаах оҕолору талыылара буолла.

Маны сэргэ Ньурба, Сунтаар уонна Бүлүү улуустарын култуура эйгэтин эдэр үлэһиттэригэр «Дублер» диэн дьыалабыай оонньуу тэрилиннэ.

Россияҕа Литература сыла ыытылларынан, бу үөрэтии биир интэриэһинэй хайысхатынан анал литературнай салону үлэлэтии буолла. Манна улуустааҕы киин библиотека тэрийиитинэн Сунтаар айар үлэнэн дьарыгырааччылара, «Ньургуһун» литературнай түмсүү чилиэннэрэ көхтөөхтүк кытыннылар. Дириҥ иэйиилээх, истиҥ-иһирэх тыллардаах хоһооннор ааҕылыннылар. Билиҥҥи литература туругун, сайдар кэскиллэрин тула сэргэх кэпсэтии буолла. Инники былааннар торумнаннылар.

Сэргэх тэрээһин бастакы күнэ улуус киинин «Добун» Култуура киинигэр киэҥ программалаах кэнсиэринэн түмүктэннэ. Сунтаар үрдүк ирдэбиллээх көрөөччүлэрин куттарын СР култууратын үтүөлээх үлэһитэ ырыаһыт, талааннаах мелодист, музыковед Владимир Корякин-Индигирскэй, Эстрада театрын солиһа Роман Данилов-Саргылаан тэтимнээх ырыалара тутуохтарын туттулар, дохсун ытыс тыаһынан доҕуһуолланнылар. Бүлүү Илбэҥэтиттэн Илья Саввин, Сунтаартан Иван Семенов уонна Марик Андреев республика «сулустарыттан» хаалсыбакка ыллаатылар-туойдулар.

Кэнсиэр сүрэххэ сөҥмүт, хатыламмат нүөмэрдэринэн, биллэн турар, хореография училищетын үөрэнээччилэрин үҥкүүлэрэ буолла. Манна үөрэх кыһатын 3-с кылааһын үөрэнээччилэрэ Сунтаартан Аэлита Павлова, Саяна Егорова балет искусствотын классическай үҥкүүлэриттэн сольнай толоруулара көрөөччүлэри сэргэхситтэ. Салгыы Музыка үрдүкү оскуолатын үөрэнээччилэрэ уонна уһуйааччылара истээччилэри музыка кэрэ абылаҥар сирдээтилэр.

Түмүктээн эттэххэ, бу үөрэхтээһин турнета чопчу Сунтаартан саҕаламмыта мээнэҕэ буолбатах. Манна, биллэн турар, Сунтаар республикаҕа култуура уонна искусство эйгэтигэр инники күөҥҥэ сылдьара оруолу ыллаҕа. Аны туран быйыл оҕону, ыччаты искусствоҕа киэҥник уһуйбут хатыламмат талааннаах норуот ырыаһыта С.А. Зверев-Кыыл Уола төрөөбүтэ 115 сыла буолар. Үбүлүөйдээх сыл бастакы улахан тэрээһинэ – оһуохай республикатааҕы эстафетата оруобуна бу кулун тутар 3 күнүттэн Ыгыаттаттан саҕаланна. Эстафета республика улуустарынан, улуу Туймаада ытык ыһыаҕар сылдьан баран, аны сайын Сунтаарынан түмүктэниэхтээх. Дьэ, ити барыта республика таһымнаах култуура эйгэтин үлэһиттэригэр аналлаах сырыы Олоҥхо дойдута Сунтаартан саҕаланыытыгар олук оҕустаҕа.

Мантан салгыы бу айан-туур республика бары улуустарын хабан ыытыллара былааннанар.