Ыраахтан сылдьар ыалдьыттар улууспут баһылыгын эбээһинэһин толорооччу А.В.Никитины, тыа хаһаайыстыбатын управлениетын начальнигын В.И.Тихоновы кытта көрүстүлэр. Онно эппиттэринэн, эт боруода быһыытынан аан дойдуга аатырар калмык сүөһүтэ ханна да былдьаһыкка сылдьар эбит. Билиҥҥи туругунан бэйэлэригэр 612 тыһ. төбө сүөһүлээхтэр. Кинилэр сүөһүлэрэ Россия 6 регионугар 26 араас сиргэ бааллар эбит. Ол иһигэр Саха сиригэр 6 хаһаайыстыбаҕа тыһыынчаттан тахса төбө. Ону кытары Казахстаҥҥа, Азербайджаҥҥа бааллар.

Биллэн турар, калмыктар сүөһүлэрин хайдах хайгыахтарын билбэттэр. АХШ тыатын хаһаайыстыбатын урукку министрэ О.Фриман «Единственное, что я хотел бы приобрести в Советском Союзе – это калмыцкий скот», - диэбитин киэн тутта этэллэр. Оттон биһиги да, ол аан дойдуга биллэр үчүгэй хаачыстыбалаах эттээх сүөһүнү аҕалан, ууһатан-тэнитэн иитэргэ баҕарбыппыт, ымсыырбыппыт иһин, айылҕабыт атына сыттаҕа дии. Калмыктар бэйэлэрэ этэллэринэн, кинилэргэ аҕыйах хонукка муҥутаан 30 кыраадыска эрэ тиийэ тымныйар эбит.

Кинилэр Кириэстээххэ, Кутана Тумулугар баар сүөһүлэрин көрдүлэр-иһиттилэр, үлэһиттэргэ сүбэ-ама биэрдилэр. Өссө биир бэйэлэрин бэрэстэбиитэллэрин Үөһээ Бүлүү Намыгар уонна биһиэхэ көрөргө-истэргэ, үлэһиттэри үөрэтэргэ диэн хаалларбыттар.

СР тыатын хаһаайыстыбатын уонна аска-үөлгэ политикатын министрэ А.Е.Артемьев президеннээх Калмыкия боруода сүөһүтүн иитээччилэр ассоциациялара диэн тэриллибит. Биһиги улууска калмык сүөһүлэрин бастакынан суолу тэлэн аҕалбыт «Кириэстээх» ТХПК урукку салайааччыта В.С.Егоров вице-президенинэн, оттон ассоциация толорооччу директорынан Тыа хаһаайыстыбатын уонна ас-үөл политикатын министерствотын сүөһү иитиититигэр департаменын салайааччытын солбуйааччы Г.Н.Осипова талыллыбыттар. Инникитин калмык сүөһүтүн биһиги Сахабыт сиригэр иитии, үөскэтии өссө киэҥ далааһыннанар кэскиллээх.