Сыллата күрэхтэһиигэ нэһилиэктэр, оскуолалар хамаандалара көхтөөхтүк кытталлар. Бу да сырыыга 18 хамаандаттан 216 спортсмен 12 этаптаах эстафетаҕа илин-кэлин түһүстэ. Үгэскэ кубулуйан ыытыллар тэрээһини улуус дьоно-сэргэтэ сыллата кэрэхсээн көрөр. Эстафетаны редакция коллектива, «Урожай» общество, спорт управлениета, чэпчэки атлетикаҕа улуустааҕы федерация, Майа дьаһалтата тэрийэн ыыталлар. Куоталаһыыны солбуллубат комментатор Виталий Пестряков иилээн-саҕалаан ыытта.

Бастакы бөлөххө Дьаҥхаады нэһилиэгэ бастаата, иккис - майалар, үһүс миэстэни Хара нэһилиэгин сүүрүктэрэ ыллылар.

Иккис бөлөххө «Эркээйи» хаһыат уонна улуустааҕы баһаарынай сулууспа үлэһиттэрин холбоһуктаах хамаандата кыайыыны ситистэ. Иккис миэстэҕэ Доллу, үһүскэ Ходоро нэһилиэктэрин хамаандалара таҕыстылар.

Оскуолалар ортолоругар Хара орто оскуолатын хамаандата эрэллээхтик бастыыры ситистэ. Иккиһи Ф.Г.Охлопков аатынан Майа орто оскуолата, үһүс миэстэни Майатааҕы лицей хамаандалара ыллылар.