Волейболга коммерческай күрэхтэһииттэн киирбит үп Яна Слепцова эмтэнэ барарыгар бэрилиннэ

Аҕыйах хонуктааҕыта Покровскай куоракка волейболга коммерческай турнир ыытылынна. Онтон киирбит үп Покровскай 1 №-дээх орто оскуолатын маҥнайгы кылааһын үөрэнээччитэ Яна Слепцова Германияҕа эмтэнэ барарыгар бэрилиннэ.

Турнир тэрийээччилэриттэн биирдэстэрэ, улуус киин балыыһатын провизора А.С.Васильеваны көрсөн кэпсэттим.
- Бүгүн биһиэхэ алта хамаанда кэллэ. Дьокуускай куорат, «Эркээни», колледж уонна Покровскай хамаандалара бааллар. Маннык турнирдар үгэскэ кубулуйан сылын аайы ыытыллыахтара диэн эрэнэбин. Слепцова Янаҕа анаан хомуйбут харчыбытын барытын кини эмтэнэригэр аныыбыт, - диэтэ Александра Семеновна.
Покровскайдааҕы спорткомплекс дириэктэрэ Олег Иванов маннык эттэ:
- Бу Покровскайга аан бастаан «Үтүө санаа» турнирын ыараханнык ыалдьыбыт Яна Слепцоваҕа көмөлөһөр сыаллаах ыытан эрэбит. Инникитин да уустук балаһыанньаҕа түбэспит дьоҥҥо көмөлөһөр инниттэн үтүө санааланыы күрэхтэһиилэрин тэрийэн ыытар былааннаахпыт.
Коммерческай турнирга Дьокуускайтан «Сахамедиа» кулууп кытынна.
- Бу оҕо ыарахан ыарыыга ылларбытын чугастык ылынаммыт, көмөлөһөр сыаллаах кэллибит. Биһиги кулууппут иһинэн үтүө санааланыы турнирдарын ыытааччыбыт. Онон, бу турнир ыытылларын туһунан истээт, тута барабыт диэн быһаарыммыппыт. Яночка хайаан да үтүөрүөн наада. Атын да хайысханан көмөлөһүөхпүт дии саныыбын. Яна туһунан хаһыакка сырдатыахпыт, - диэн санаатын үллэһиннэ хамаанда чилиэнэ, «Якутия» хаһыат суруналыыһа Мария Павлова.

Киэһэ хойукка диэри буолбут күрэхтэһии кыайыылааҕынан Покровскай-1 хамаандата (капитан Александра Карпова) буолла. Иккис миэстэҕэ «Сахамедиа» кулууп таҕыста. Үһүс миэстэни Покровскайдааҕы колледж хамаандата ылла. Кыайыылаахтарга «Үтүө санаа» көһө сылдьар кубога туттарылынна. Миэстэлэспит хамаандалар оонньооччулара мэтээллэринэн, грамоталарынан бэлиэтэннилэр.
Күрэхтэһиини ыытыыга көмөлөспүт үтүө дьоҥҥо: Зверева Татьяна Николаевнаҕа («Эмма» маҕаһыын), Егорова Розалия Ивановнаҕа («Сунтаар» маҕаһыын), Михайлова Галина Афанасьевнаҕа («Гараж» маҕаһыын), Другина Елена Гаврильевнаҕа («Союз» Эргиэн киинэ), «Купец», «Фрукты и овощи» маҕаһыыннар үлэһиттэригэр уонна спорткомплекс дириэктэригэр Иванов Олег Иннокентьевичка тэрийээччилэр ис сүрэхтэриттэн махтаналлар.
Бу күн тэрийээччилэр бэйэлэрин күүстэринэн буфет тэрийбиттэр, онон атыыттан уонна хамаандалартан киирбит 31 000 солкуобай Яна Слепцова эмтэнэригэр көмө буолуо.