Кэргэннии Петр уонна Тамара – ХИФУ Нерюнгритааҕы Техническэй институтун бүтэрбиттэрэ. Кинилэр 2009 сыллаахха ыал буолбуттара. Таптыыр кыыстара Сунтаара кинилэр сүрэхтэрин быһаччы холбообута. Ол эрээри олох бэйэтэ дьон олоҕун уларытар, кыра кыысчаан ыарыһах төрөөбүтэ. Кини диагноһа – церебральнай паралич. Ол иһин эдэр ыал олохтоох бэйэни салайыныы уонна общественность көмөтүгэр, болҕомтотугар наһаа наадыйар.

Бу тэрээһини «Ыллык» дьиэ кэргэн кулуубун салайааччыта Анастасия Лаврентьева «Саха аймах» общественнай тэрилтэ уонна куораттааҕы библиотека өйөбүлүнэн көҕүлээтэ.

«Бу ыалы өйүүргэ социальнай ситим нөҥүө бэйэ илиитинэн оҥоһугу уонна киэргэли хомуйарга ыҥырыы таһаарбыппыт. Нерюнгри олохтоохторо итини өйөөн, бэйэлэрин айбыт үлэлэрин быыстапкаҕа атыылыы аҕалбыттара. Үтүө аһыныгас санаанан салайтаран, кыра кыысчааҥҥа анаммыт остуоруйаны биһиги саамай сүрүн бырааһынньык — Саҥа Дьыл иннинэ оҥорорго быһаарыммыппыт», - диир Анастасия Лаврентьева.

Эдэр ыалга истиҥ өйөбүл тылларын Нерюнгри оройуонун администрациятын ыччакка уонна социальнай полтитикаҕа салаатын специалиһэ Екатерина Бакирова, «Арктика» оскуола педагога Ираида Мальцева, «Саха аймах» общественнай тэрилтэ бэрэссэдээтэлэ Алексей Неустроев, райсовет бэрэссэдээтэлин солбуйааччы Анатолий Шевченко, Серебрянай Бор балыыһатын кылаабынай бырааһа, Нерюнгри оройуонунааҕы Сэбиэт депутата Гаврил Иванов, оройуон библиотекатын салаатын сэбиэдиссэйэ Антонида Зангеева эттилэр. Тыл этээччилэр бэлэхтэри туттардылар, харчынан көмөлөстүлэр.

Үс күн устата ыытыллыбыт акция түмүгэр киирбит харчы эдэр ыал фондатыгар киирдэ.