Бастаан утаа

Тэлгэһэҕэ оонньуу сылдьыбыт үс саастаах Айаана Винокурова уонна Алина Иванова сүппүттэрин туһунан иһитиннэрии Хаҥалас полициятын дьуһуурунай чааһыгар бэс ыйын 25 күнэ үүнэр түүнүгэр, 01.00 чаас саҕана киирбит. Эбээлэрэ сиэннэрэ суохтарын киэһэ 20.00 чаас саҕана өйдөөн көрөн, бастаан бэйэтэ көрдүү сатаабыт, онтон дьэ, нэһилиэк баһылыга Сергей Логиновка тыллаабыт. Тутатына олохтоохтор, сүүсчэкэ киһи буолан, оҕолору көрдөөһүнү саҕалаабыттар. Көмөҕө полиция уонна РФ Ыксаллаах быһыыга-майгыга министерствотын Саха сиринээҕи управлениетын үлэһиттэрэ итиэннэ ити күн Сиинэҕэ СР ИДьМ-тын авиационнай этэрээтин бөртөлүөтэ, кинологтар тиийбиттэр.

Ити күн ураты суолталаах дьыалалары силиэстийэлиир отдел старшай силиэдэбэтэлэ салайааччылаах суһал-силиэстийэлиир бөлөх тэриллибитэ. РФ Силиэстийэлиир кэмитиэтин Саха сиринээҕи управлениета кыра оҕолор сүппүт чахчыларынан РФ Холуобунай кодексатын 105-с ыст. 2-с чааһын «а», «в» пууннарынан холуобунай дьыала тэрийбитэ. Ол эбэтэр, бэйэтин көмүскэнэр кыаҕа суох икки киһини өлөрүү бэлиэтэ баарынан.

Бэс ыйын 26 күнүгэр Сиинэҕэ суһал-силиэстийэлиир бөлөх үлэтин сүрүннүүр сыалтан Силиэстийэлиир управление салайааччыта Олег Мезрин, Дьокуускай куораттан сүүстэн тахса доброволецтар, водолазтар, Быыһыыр сулууспа 20 үлэһитэ, ЫБММ психолога тиийбиттэрэ. Бөртөлүөтүнэн көрдөөһүн ол күн туох да түмүгү биэрбэтэҕэ.

Бэс ыйын 27 күнүгэр, Сиинэҕэ ис дьыала министрэ, полиция генерал-майора Виктор Кошелев уонна ОМОН этэрээтин 15 байыаһа, ИДьМ эксперт-криминалистара тиийбиттэрэ. Сүппүт дьону көрдөөһүҥҥэ сокуонунан ирдэнэр уон күн туолбутунан, көрдөөһүн үлэтэ тохтообута эрээри, силиэстийэ салҕанан барбыта.

СР Президенэ Егор Борисов оҕолор ханна баалларыгар сыһыаннаах иһитиннэриини биэрбит киһиэхэ 1 мөл.солк. суумалаах манньа көрүллүөҕэ диэн быһаарбыта.

Сыл устатыгар

Кырачаан барахсаттар ууга тааһы бырахпыттыы сүппүттэринэн «өлбүттэрин булбуттар», «биирдэстэрэ тыыннаах үһү» эҥин диэн интернетинэн араас хобдох сурахтар тарҕананнар, РФ Силиэстийэлиир кэмитиэтин Саха сиринээҕи управлениетын салалтата от ыйын ортотугар суруналыыстарга брифинг оҥорбута. Онно Олег Мезрин «билиҥҥитэ чопчу уорбаланааччы суох, бакаа Сиинэ олохтоохторо бары уорбаланаллар» диэн эппитэ, дьону ол-бу сымыйа сурахтары итэҕэйбэттэригэр, туох эмит чахчылаах иһитиннэрии баар буоллаҕына, быраабы араҥаччылыыр уорганнарга тута биллэрэллэригэр сүбэлээбитэ.

Оҕолор сүппүттэрэ балтараа ый буолбутун кэнниттэн, атырдьах ыйын 2 күнүгэр, биһиги хаһыаппытыгар ааттаан-суоллаан, сүппүт кыргыттартан биирдэстэрин, Алина эбэтэ Ольга Иванова «Милосердие» фонда салайааччыта Александра Андросовалыын кэлэ сылдьыбыттара. Онно Ольга Павловна «уорбалыыр киһим суох, олох өйбөр да суох, ким эрэ уорбута буолуо диэн. Ама хайаан оннук буолуой!» диэн санаатын эппитэ.

Алтынньы ыйга «Саха» НКИК «Честная Якутия» диэн саҥа биэриитигэр бу дьыаланы ырыппыттара. Бэйэм чааһым биэриини астымматаҕым. Хайдах эрэ күүстээх утарыта туруоруу баар курдугун иһин. Сиинэ олохтоохторун – сокуон уорганнарыгар. Дьиҥэр, сыал биир, баҕа санаа биир буоллаҕа – оҕолору булуу, оҕолор ким-туох буруйунан сүппүттэрин арыйыы.

Быйыл

Кырачаан эрэйдээхтэр сүппүттэрэ тоҕус ый буолбутун кэнниттэн, олунньу ый бүтүүтүгэр, кыргыттар ийэлэрэ Екатерина Иванова уонна Лана Устинова Москва куоракка, ТНТ ханаалыгар «Битва экстрасенсов» биэриитигэр кыттыбыт көрбүөччүлэри көрсүһэ барбыттара. Маннааҕы көрбүөччүлэр кыайан көмөлөспөтөхтөрүттэн, силиэстийэ уорганнарын өттүттэн туох да сибики суоҕуттан, бүтэһик эрэл оҥостон, онно тиийбиттэрэ. Көрбүөччү Фатима Хадуева «мин сүппүт дьону көрдөөһүнүнэн дьарыктаммаппын, кыргыттар көстүбэттэр» диэбит этэ.

Муус устар 22 күнүгэр РФ Силиэстийэлиир кэмитиэтин Саха сиринээҕи управлениетын салалтата пресс-конференция оҥобута. Онно Олег Мезрин иһитиннэрбитинэн, өрөбүлгэ, муус устар 20 күнүгэр, 1968 сыллаах төрүөх Гаврил Иванов (Алина эһэтэ) Силиэстийэлиир отделга чахчы бэйэтэ кэлэн, кырачаан кыргыттар өлүүлэригэр сыһыаннааҕын туһунан эппит уонна буруйун билинэр сайабылыанньа суруйбут. Сарсыныгар, муус устар 21 күнүгэр, силиэстийэ уонна полиция үлэһиттэрэ Сиинэҕэ суһал-силиэстийэлиир дьайыылары оҥороору, бөртөлүөтүнэн тиийэн, Иванов ыйбыт сирин көрбүттэр да – өлүктэри булбатахтар. Ол кэнниттэн Иванов бэйэтин көрдөрүүтүттэн аккаастаммыт.

Ыам ыйын 9 күнүгэр Сиинэҕэ ампаарга «Сиинэ дьыалатыгар» туоһу быһыытынан доппуруостаммыт 32 саастаах Василий Латышев өлүгэ көстүбүтэ. Кини ыйаммыт, сүрэҕэр быһаҕынан анньыллыбыт этэ.

Бэс ыйын 24 күнүгэр «Вести-Саха» телеханаалга РФ СК ССУ ураты суолталаах дьыалалары силиэстийэлиир отделын старшай силиэдэбэтэлэ Алексей Калачев иһитиннэрбитинэн, бу дьыала силиэстийэтэ балаҕан ыйын 25 күнүгэр диэри уһатыллыбыт. Уорбаланааччы быһыытынан Гаврил Иванов сылдьар эрээри, кини ити буруйга сыһыаннааҕа-суоҕа бигэргэнэ да, туоратылла да илик.